దుబ్బాకలోనూ హుజూర్​నగర్​ ఫలితమే: జగదీశ్ రెడ్డి

సూర్యాపేట జిల్లా మఠంపల్లి వద్ద కృష్ణానదిపై బ్రిడ్జిని మంత్రులు జగదీశ్ రెడ్డి, ప్రశాంత్ రెడ్డి ప్రారంభించారు. దుబ్బాకలోనూ హుజూర్​నగర్​ ఫలితమే పునరావృతమవుతుందని ధీమా వ్యక్తం చేశారు. కాంగ్రెస్, భాజపా డిపాజిట్ల కోసం పోటీ పడుతున్నాయని ఎద్దేవా చేశారు.

దుబ్బాక ప్రజలు భాజపా, కాంగ్రెస్​కు తగిన గుణపాఠం చెబుతారని రాష్ట్ర విద్యుత్​శాఖ మంత్రి గుంటకండ్ల జగదీశ్​ రెడ్డి వ్యాఖ్యానించారు. సూర్యాపేట జిల్లా మఠంపల్లి వద్ద... తెలంగాణ-ఆంధ్రప్రదేశ్​ను కలుపుతూ కృష్ణా నదిపై నిర్మించిన బ్రిడ్జి ప్రారంభోత్సవానికి రోడ్లు భవనాల శాఖ మంత్రి వేముల ప్రశాంత్​ రెడ్డితో కలిసి హాజరయ్యారు. హుజూర్​నగర్​ ఫలితమే దుబ్బాకలోనూ పునరావృతం కానుందని ధీమా వ్యక్తం చేశారు. భాజపా, కాంగ్రెస్ డిపాజిట్ల కోసం పోటీ పడుతున్నాయని దుయ్యబట్టారు.

ముఖ్యమంత్రి కేసీఆర్​ మీద సంపూర్ణ విశ్వాసంతో... ఏ ఎన్నికలు వచ్చినా రాష్ట్ర ప్రజలు తెరాసకు పట్టం కడుతున్నారని జగదీశ్ రెడ్డి పేర్కొన్నారు. దొంగే దొంగా దొంగా అన్నట్టు భాజపా పరిస్థితి తయారైందని ఎద్దేవా చేశారు. ప్రజలను గందరగోళంలోకి నెట్టి లబ్ధిపొందాలనుకుంటున్న వారి జిమ్మిక్కులు ప్రజలు నమ్మరన్నారు. ఎన్నికల కమిషన్​ను కూడా తప్పుదోవ పట్టించిన చరిత్ర ఆ రెండు పార్టీలకు ఉందని... అదే పని దుబ్బాకలోనూ చేయాలని ప్రయత్నిస్తున్నారని ఆరోపించారు. ముఖ్యమంత్రి అక్కడి ప్రజల నిర్ణయానికే వదిలేశారని పేర్కొన్నారు.

ఇదీ చూడండి: కూతురి హత్య కేసులో తండ్రి, సవతితల్లి, మామకు యావజ్జీవం