ఈ ఇద్దరు అన్నదమ్ముల్ని కష్టాలు పగబట్టినయా

వైద్యులకే అంతుచిక్కని వ్యాధి ఈ కుటుంబాన్ని చిన్నాభిన్నం చేసింది. ఎదిగొచ్చిన కొడుకులు కదళ్లేకుండా పడిఉంటే చూడలేక ఆ తల్లిదండ్రులు తల్లడిల్లిపోతున్నారు. పదేళ్ల ప్రాయం వరకు ఆడుతూ పాడుతూ తిరిగిన బిడ్డలు మంచానికే పరిమితమయ్యారు. కష్టాలన్నీ మూకుమ్మడిగా దాడిచేసి దయనీయంగా మారిన తమను ప్రభుత్వం ఆదుకోవాలని  వేడుకుంటున్నారు సిద్దిపేట జిల్లా హుస్నాబాద్​కు చెందిన బీరెడ్డి శ్రీధర్​ రెడ్డి, మమత దంపతులు.

వైద్యులకే అంతుచిక్కని మహమ్మారి ఎదిగిన బిడ్డలను మంచాన పడేసింది. తల, చేతి వేళ్ళు మాత్రమే కదిలించడం తప్ప కూర్చున్న చోటు నుంచి కదల్లేని దురవస్థలోకి నెట్టేసింది. సిద్దిపేట జిల్లా హుస్నాబాద్​కు చెందిన బీరెడ్డి శ్రీధర్ రెడ్డి, మమత దంపతులకు సుజిత్, సౌరబ్ కుమారులు. పుట్టినప్పటి నుంచి ఆరోగ్యంగా ఉన్నప్పటికీ పదేళ్ల ప్రాయం వచ్చేసరికి ఆధునిక వైద్యానికి కూడా అంతుచిక్కని కండరాలకు సంబంధించిన వ్యాధి ఆ ఇద్దరు అన్నదమ్ములను దివ్యాంగులుగా మార్చేసింది.

ఒకరి తర్వాత ఒకరిని..

మొదట చిన్న కుమారుడు సౌరబ్ ఈ వ్యాధి భారిన పడ్డాడు. ఆరు నెలల వ్యవధిలోనే పెద్ద కుమారుడు సుజిత్​ను చుట్టుముట్టింది. హైదరాబాద్, ఢిల్లీ, బెంగుళూరు సహా ఎన్నో నగరాల్లోని ఆస్పత్రుల్లో చూపించినా ప్రయోజనం లేదు. లక్షలు ఖర్చుచేసినా ఫలితం శూన్యం. చివరికి వీరి రిపోర్టులను అమెరికాలో వైద్యులకు పంపించారు. వారు కూడా ఈ వ్యాధికి చికిత్సలేదని చేతులెత్తేశారు. ఇద్దరు కొడుకులు పుట్టారన్న సంతోషం శ్రీధర్ రెడ్డి, మమత దంపతులకు కన్నీటినే మిగిల్చింది.

కష్టాలు పగబట్టినయా

ఇద్దరు పిల్లల్లో సుజిత్​కు ఓ కిడ్నీ పాడైంది. ప్రస్తుతం ఒక్క కిడ్నీతోనే బతుకీడుస్తున్నాడు. ఇన్ని కష్టాలు చాలవన్నట్లు శ్రీధర్​ రెడ్డి తండ్రి ఈమధ్యనే జరిగిన ఓ ప్రమాదంలో కాలుని కోల్పోయాడు. ఇంటి నిండా కష్టాలతో స్కూలు బస్సు డ్రైవర్​గా పనిచేస్తున్న శ్రీధర్​ రెడ్డి కుటుంబం మొత్తానికి కొద్దిపాటి జీతం డబ్బులే జీవనాధారం.

సారూ.. సాయం చేయండి

అడుగు కూడా కదపలేని పిల్లలను కదల్చడం ఎవరివల్ల కావడం లేదు. తండ్రే అన్నీ తానై పిల్లలకు సపర్యలు చేస్తున్నాడు. కనీసం సదరన్​ శిబిరానికి వెళ్లలేని స్థితిలో వీరున్నారు. ప్రభుత్వం తరఫున సాయం చేసి తమ కుటుంబాన్ని ఆదుకోవాలని కుటుంబమంతా చేతిలెత్తి వేడుకుంటున్నది.

ఇదీ చూడండి: 'వారి తల్లిదండ్రులను ఆదుకోండి..'