పల్లె ప్రగతిలో భాగంగా సిద్దిపేట జిల్లా గజ్వేల్ నియోజకవర్గ పరిధిలోని జగదేవ్పూర్ మండలం తీగూల్లో కలెక్టర్ వెంకట్రామిరెడ్డి పర్యటించారు. గ్రామంలోని డంప్ యార్డు, వైకుంఠధామం, గ్రామ నర్సరీలను సందర్శించి పనుల పురోగతిపై అధికారులను ఆరా తీశారు. వచ్చే నెల 6వ తేదీన తీగుల్ గ్రామ డంప్ యార్డులో సమావేశం జరపాలని, అప్పటిలోపు డంప్ యార్డును వినియోగంలోకి తేవాలని ఏంపీడీవోను కలెక్టర్ ఆదేశించారు. పల్లెప్రగతిలో భాగంగా గ్రామంలో చేపట్టిన పనులపై అధికారులను అడిగి తెలుసుకున్నారు. ఈ నెల 25న ప్రారంభం కానున్న హరితహారంపై గ్రామ ప్రజాప్రతినిధులు, అధికారులతో సమీక్ష నిర్వహించారు.
2017-18 సంవత్సరంలో ఎవెన్యూ ప్లాంటేషన్లో భాగంగా తీగూల్ గ్రామంలో నాటిన మొక్కలు 70 శాతం బతికి ఉన్నాయని, గ్రామస్థుల కృషి, అధికారుల సమన్వయంతో చెట్లు ఏపుగా పెరిగాయని కలెక్టర్ అన్నారు. వీటి తరహాలోనే అన్నీ గ్రామాలు ఇదే స్ఫూర్తితో చెట్లు పెంచాలని జిల్లా కలెక్టర్ వెల్లడించారు. పచ్చదనం పెంపు దిశగా స్పష్టమైన మార్పు కనిపించేలా ఆరో విడత హరితహారాన్ని చేపట్టాలని అధికారులకు జిల్లా పాలనాధికారి సూచించారు. ఇటీవల కలెక్టర్లతో సమావేశం సందర్భంగా అన్ని జిల్లాలకు, పట్టణ ప్రాంతాలకు హరితహారంపై ముఖ్యమంత్రి మార్గనిర్ధేశం చేశారని, ఆ మేరకు జిల్లాలో పట్టణాలు, గ్రామాల వారీగా హరితహారం లక్ష్యాలు కూడా పెరిగాయని కలెక్టర్ పేర్కొన్నారు.
ఇవీ చూడండి: 'జూన్ నెల నుంచి పూర్తి జీతాలు, పింఛన్లు'
