How to Make Dahi Aloo Recipe : మనలో చాలా మంది ఇంట్లో ఆలూ గడ్డలుంటే వాటితో ఫ్రై, లేదా టమాటాలు వేసి కర్రీ చేసేస్తుంటారు. ఎప్పుడూ ఒకేలా చేస్తే ఇంట్లో వాళ్లందరూ.. మళ్లీ ఆలూ కర్రీనే వండావా.. అని ముఖం తిప్పేస్తుంటారు. అయితే.. ఈ సారి కాస్త కొత్తగా పొటాటోతో నార్త్ ఇండియా స్టైల్లో "దహీ ఆలూ కర్రీ" ప్రిపేర్ చేయండి. ఈ స్టోరీలో చెప్పిన విధంగా చేస్తే కర్రీ అన్నం, చపాతీల్లోకి రుచి అద్దిరిపోతుంది. ఇది చేయడానికి ఎక్కువ టైమ్ కూడా పట్టదు. సింపుల్గా ఇంట్లో ఉండే పదార్థాలతోనే చేసేసుకోవచ్చు. మరి ఇక ఆలస్యం చేయకుండా టేస్టీ దహీ ఆలూ కర్రీ ఎలా చేయాలో ఓ లుక్కేయండి..
కావాల్సిన పదార్థాలు :
- చిన్న బంగాళాదుంపలు-350 గ్రాములు
- రెండు చిటికెళ్ల ఇంగువ
- మిరియాలపొడి- 2 టీస్పూన్లు
- జీలకర్ర- అరటీస్పూన్
- ఉప్పు రుచికి సరిపడా
- కలోంజి (ఉల్లి గింజలు)-రెండు చిటికెళ్లు
- ఉల్లిపాయ-1
- టమాటాలు-2
- అల్లం వెల్లుల్లి పేస్ట్-టేబుల్స్పూన్
- ధనియాలపొడి-టీస్పూన్
- వేయించిన జీలకర్ర పొడి-టీస్పూన్
- గరం మసాలా- అరటీస్పూన్
- కొత్తిమీర తరుగు
- పెరుగు-300 గ్రాములు
తయారీ విధానం..
- ముందుగా బంగాళదుంపలను శుభ్రంగా కడిగి ఒక గిన్నెలోకి తీసుకోవాలి. గిన్నెను స్టౌపై పెట్టి 2 గ్లాసుల నీళ్లు పోసి బంగాళదుంపలను 80 శాతం ఉడికించుకోవాలి.
- ఈ కర్రీలోకి ఆలుగడ్డలను పూర్తిగా మెత్తగా కుక్ చేసుకోకూడదు. మీరు చిన్న బంగాళదుంపలకు బదులుగా.. పెద్ద ఆలూని 4 ముక్కలుగా కట్ చేసుకుని కూడా వండుకోవచ్చు
- తర్వాత వాటిని ఒక ఒక ప్లేట్లోకి వేసుకుని పొట్టు తీసేసుకోవాలి.
- అలాగే ఉల్లిపాయ, పచ్చిమిర్చి, టమాటాలను సన్నగా కట్ చేసుకోండి. ఒక మిక్సీ జార్లోకి టమాటా ముక్కలను తీసుకుని మెత్తగా పేస్ట్ చేసుకోండి.
- ఇప్పుడు స్టౌపై పాన్ పెట్టండి. ఇందులో కొద్దిగా నూనె వేసి వేడి చేయండి. ఆపై పొట్టు తీసుకున్న బంగాళదుంపలు వేసి ఫ్రై చేసుకోండి.
- బంగాళదుంపలపై గోల్డెన్ కలర్ రాగానే ఇంగువ, ఉప్పు, కొద్దిగా మిరియాలపొడి వేసి బాగా కలపండి. ఒక రెండు నిమిషాల తర్వాత ఆలూని ఒక ప్లేట్లోకి తీసుకోండి.
- ఇప్పుడు అదే పాన్లో కొద్దిగా ఆయిల్ వేసి వేడి చేయండి. ఆపై జీలకర్ర, కలోంజి గింజలు వేసుకోండి. ఆపై ఉల్లిపాయ ముక్కలు వేసి గోల్డెన్ కలర్ వచ్చేంత వరకు వేపుకోండి.
- ఇప్పుడు అల్లం వెల్లుల్లి పేస్ట్, ఉప్పు, ధనియాలపొడి, వేయించిన జీలకర్ర పొడి, గరం మసాలా, పసుపు, కొద్దిగా మిరియాలపొడి, పచ్చిమిర్చి ముక్కలు వేసి ఫ్రై చేయండి.
- 2 నిమిషాల తర్వాత టమాటా పేస్ట్ వేసి కలపండి. నూనె పైకి తేలిన తర్వాత వేపుకున్న ఆలూ వేసి కలపండి.
- ఒక ఐదు నిమిషాలు మూత పెట్టి అలా వదిలేయండి. తర్వాత స్టౌ ఆఫ్ చేసి చిలికిన పెరుగు వేసుకుని మిక్స్ చేయండి.
- కూరలో పెరుగు బాగా కలిసిన తర్వాత స్టౌ ఆన్ చేసి.. నూనె పైకి తేలెంత వరకు మూత పెట్టి ఉడికించుకోండి.
- ఆపై కర్రీలోకి కాస్త కొత్తిమీర తరుగు చల్లుకుని స్టౌ ఆఫ్ చేసుకుంటే సరిపోతుంది.
- అంతే ఘుమఘుమలాడే కమ్మటి దహీ అలూ కర్రీ మీ ముందుంటుంది.
- నచ్చితే ఇలా ఓ సారి ట్రై చేయండి.
ఇవి కూడా చదవండి :
దాబా స్టైల్ "ఆలూ భునా మసాలా" - ఒక్కసారి తింటే మళ్లీ మళ్లీ కావాలంటారు!
అన్నం, టిఫెన్స్లోకి సూపర్ కాంబినేషన్ - ఘుమఘుమలాడే "హరియాలీ దమ్ ఆలూ" - నెవ్వర్ బిఫోర్ టేస్ట్!
