సిద్దిపేట జిల్లా మర్కూక్ మండలంలో నిర్మించిన కొండపోచమ్మ సాగర్ జలాశయం ప్రారంభానికి అధికారులు సర్వం సిద్ధం చేశారు. ముఖ్యమంత్రి కేసీఆర్, చిన్నజీయర్ స్వామితో కలిసి ప్రారంభించనున్నారు. సీఎం పర్యటనకు అధికారయంత్రాంగం ఏర్పాట్లు పూర్తి చేసింది. 1200 మంది పోలీసులు బందోబస్తు నిర్వహిస్తున్నారు. ముఖ్యమంత్రి పర్యటనకు సంబంధించి ఎలాంటి సమస్యలు తలెత్తకుండా మంత్రి హరీశ్ రావు దగ్గరుండి పర్యవేక్షిస్తున్నారు.
ముందుగా జగదేవపూర్ మండలంలో ఉన్న కొండపోచమ్మ ఆలయం వద్ద చండీహోమం పూర్ణాహుతి కార్యక్రమంలో ముఖ్యమంత్రి కేసీఆర్ దంపతులు పాల్గొంటారు. అక్కడి నుంచి నేరుగా ఎర్రవల్లిలోని వ్యవసాయ క్షేత్రానికి చేరుకుంటారు. ఎర్రవల్లి నుంచి మార్కూక్ చేరుకుని మెుదటగా రైతు వేదికకు శంకుస్థాపన చేస్తారు. పంప్హౌస్ వద్ద సుదర్శన యాగంలో త్రిదండి చిన్న జీయర్ స్వామితో పాటు కలిసి పాల్గొంటారు. అనంతరం జలాశయం కట్ట పైకి వెళ్లి గోదావరికి జలహారతి ఇస్తారు. తర్వాత వరదరాజపూర్లోని వరదరాజ స్వామి ఆలయంలో ప్రత్యేక పూజలు చేస్తారు.
ఇదీ చూడండి: కేటీఆర్కు అరుదైన గౌరవం.. వర్చువల్ సదస్సుకు ఆహ్వానం..
