'పటాన్​చెరులో మమ్మల్ని ఎదుర్కొనే ధైర్యం ఎవరికీ లేదు'

సంగారెడ్డి జిల్లా పటాన్​చెరు డివిజన్​లో ఎమ్మెల్యే జగ్గారెడ్డి ప్రచారం నిర్వహించారు. పటాన్​చెరులో తమను ఎదుర్కొనే శక్తి ఎవ్వరికీ లేదని స్పష్టం చేశారు. ఎంత మంది పోటీకి వచ్చిన తానొక్కడే అందరికి దీటుగా నిలబడగలనన్నారు.

ఇంట్లో కూర్చుని సీఎం కేసీఆర్ గాలి​ మాటలు చెప్పటం తప్పా అభివృద్ధి మాత్రం ఏమీ లేదని సంగారెడ్డి ఎమ్మెల్యే జగ్గారెడ్డి ఎద్దేవా చేశారు. పటాన్‌చెరు డివిజన్లో కాంగ్రెస్ అభ్యర్థి జయమ్మకు మద్దతుగా జగ్గారెడ్డి ప్రచారం నిర్వహించారు. డివిజన్​లో ప్రభుత్వాసుపత్రి, జాతీయ రహదారి, బాహ్యవలయ రహదారులు కాంగ్రెస్ హయాంలో నిర్మించినవే అని ఎమ్మెల్యే గుర్తుచేశారు. పటాన్​చెరులో తమను ఎదుర్కొనే శక్తి ఎవరికీ లేదన్నారు.

ప్రతీ పేదవాని ఖాతాల్లో రూ .15 లక్షలు వేస్తానని చెప్పిన ప్రధాని మోదీ... 6 ఏళ్లు గడుస్తోన్నా ఇప్పటికీ ఒక్క రూపాయి కూడా అందట్లేదని ఆరోపించారు. ఉప ఎన్నికలో, ఎన్నికలో వస్తే తప్ప తెరాస మంత్రులు కనపడరన్నారు. జిల్లా మంత్రి పటాన్‌చెరులో ఏం అభివృద్ధి చేసారో చెప్పాలని డిమాండ్​ చేశారు. యువతను భాజాపా రెచ్చగొట్టి ఓటు రాజకీయాలు చేస్తోందని మండిపడ్డారు. కాంగ్రెస్​కు పవర్​ పాలిటిక్స్​ చేయాల్సిన అవసరం లేదని తెలిపారు.

ఇదీ చూడండి: బల్దియా పోరు: గల్లీల నిండా జిల్లాల నాయకులే!