Rajendranagar Rahul Murder Case Update : రాహుల్ హత్య కేసును ఛేదించిన పోలీసులు.. ఆస్తి తగాదాలే కారణం

Rajendranagar Rahul Murder Case Update : తమకు రావాల్సిన ఆస్తిని పంచకుండా జాప్యం చేయడమే కాకుండా.. ఇతర ఆస్తుల్లో వాటా ఇస్తానని చెప్పినా తరచూ గొడవ చేస్తున్నాడనే నెపంతో.. వరుసకు సోదరుడు అయ్యే వ్యక్తిని సుపారీ ఇచ్చి మరీ హత్య చేయించారు బంధువులు. గత నెల 29న రాజేంద్రనగర్ అత్తాపూర్​లోని సెలబ్రెటీ జిమ్‌ వద్ద సంచలనం సృష్టించిన రాహుల్​సింగ్ హత్య కేసులో పోలీసులు 8 మంది నిందితులను అరెస్ట్ చేశారు. వారి నుంచి హత్యకు ఉపయోగించిన ఆయుధాలు సహా కారు రెండు ద్విచక్రవాహనాలను స్వాధీనం చేసుకున్నారు.

Rajendranagar Rahul Murder Case Update : ధూల్​పేటకు చెందిన కమల్​సింగ్, సత్యనారాయణసింగ్‌, ఆనంద్​సింగ్​లు అన్నదమ్ములు. కమల్​సింగ్​కు మృతుడు రాహుల్​సింగ్ (Rajendranagar Rahul Murder Case Update), వికాస్​సింగ్ కుమారులు. సత్య నారాయణసింగ్​కు రాజాసింగ్ అలియాస్‌ గోపీసింగ్, ఆనంద్​సింగ్​కు.. వినోద్​సింగ్​లు కుమారులు. కమల్​సింగ్ కుటుంబం ప్రస్తుతం మణికొండ పుప్పాలగూడలో నివాసం ఉంటోంది. మిగిలిన వారు షేక్​పేటలో నివాసం ఉంటున్నారు.

మొదటి నుంచి వినోద్‌సింగ్​, గోపీసింగ్​లు కలిసి మెలిసి ఉంటున్నారు. కానీ వారు రాహుల్​సింగ్, వికాస్​సింగ్​లను దూరం పెట్టారు. వీరికి తాతల నుంచి వచ్చిన ఆస్తిలో మణికొండలో 100 గజాల స్థలం ఉంది. దీంతో పాటు అదే ప్రాంతంలో 267 గజాల వాణిజ్య సముదాయం ఉంది. 100 గజాల వ్యవహారంలో ముగ్గురికి భాగం రావాల్సి ఉండగా దాన్ని రాహుల్‌.. వినోద్​సింగ్​, గోపీసింగ్​కు రాకుండా అడ్డుపడుతున్నాడు.

కాగా వాణిజ్య సముదాయంలో ఉన్న దుకాణాల నుంచి వచ్చిన అద్దెలను.. వినోద్‌, గోపీలు తీసుకుంటున్నారు. వాటిలో రాహుల్‌ అతని సోదరుడకి మాత్రం ఇవ్వడం లేదు. దీంతో తరచూ రాహుల్‌ అక్కడకు వెళ్లి దుకాణదారులను బెదిరిస్తున్నాడు. దీంతో పాటుగా వారి నాయనమ్మ రత్నాభాయికి ఉన్న 750 గజాల స్థలాన్ని డెవలప్‌మెంట్​కు ఇవ్వగా.. రెండు విల్లాలు వీరికి వచ్చాయి. వీటిని ఆమె గోపీకి, వినోద్​కు ఇచ్చింది.

నాయనమ్మ నుంచి వచ్చిన ఆస్తిలోనూ వినోద్, గోపీలు.. తనకు భాగం ఇవ్వడం లేదని తరచూ రాహుల్​ గొడవకు దిగుతున్నాడు. పలుమార్లు ఘర్షణకు కూడా దిగారు. ఈ విషయమై వారి పెద్దలు వారికి సర్ది చెప్పారు. ఈ క్రమంలోనే విల్లాలకు గానూ తాను రూ.40 లక్షలు ఇస్తానని గోపీసింగ్ చెప్పగా.. వినోద్‌సింగ్​ రూ.20 లక్షలు ఇస్తానని రాహుల్​కు చెప్పారు. కానీ ఆ డబ్బులు కూడా ఇవ్వకుండా జాప్యం చేస్తున్నారని రాహుల్.. వారితో గొడవకు దిగాడు. దీంతో అతడిని అడ్డు తొలగించుకోవాలని వినోద్‌, గోపీసింగ్​లు నిర్ణయించుకున్నారు.

రాహుల్ నిత్యం జిమ్​కు వెళుతుంటాడు. అతని దేహదారుఢ్యం చూసి తమపై దాడులు చేస్తాడని.. ఎప్పటికైనా ప్రమాదమేనని హత్య చేయించాలనుకున్న వినోద్​సింగ్, గోపీసింగ్​లు.. రెండు నెలల క్రితం వారికి పరిచయం ఉన్న టోలీచౌకికి చెందిన అక్బర్ వద్దకు వెళ్లారు. రాహుల్​ను హతమార్చాలని అతనికి చెప్పారు. ఇందుకు రూ.15 లక్షలు సుపారీ ఇచ్చేందుకు ఒప్పందం కుదుర్చున్నారు. మొదటగా రూ.10 లక్షలు ఇచ్చారు.

"రాహుల్​ సింగ్​ అనే వ్యక్తి సెలబ్రెటీ జిమ్​ కోచ్​. జిమ్​ చేసుకొని తిరిగి ఇంటికి వెళ్లే క్రమంలో హత్యకు గురైయ్యాడు. ఇప్పుడు చనిపోయిన రాహుల్​ సింగ్​, వికాస్​ సింగ్​ కమాల్​ సింగ్​ పిల్లలు. కమాల్​ సింగ్​ వాళ్లు ముగ్గురు బ్రదర్స్​. వారు సత్యనారాయణ సింగ్, ఆనంద్​ సింగ్​​. వీరికి ఆస్తి విషయంలో గొడవలు ముందు నుంచి ఉన్నాయి. ఈ ఆస్తుల విషయంలో గొడవ కారణంగా సుపారీ ఇచ్చి హత్య చేశారు." - జగదీశ్వర్ రెడ్డి, డీసీపీ రాజేంద్రనగర్

Rajendranagar Murder Case Update : రాహుల్ నిత్యం రాజేంద్రనగర్ పరిధిలో ఉన్న.. అత్తాపూర్​లోని సెలబ్రెటీ జిమ్​కు వెళతాడని తెలిసిన అక్బర్ అదే సమయంలో హత్య చేయాలని నిర్ణయించుకున్నాడు. అక్బర్ తనకు తెలిసిన షాబాజ్‌, ఇర్ఫాన్‌, మహమూద్‌, మాజీద్‌, అప్సర్​లను కలిసి విషయం చెప్పాడు. వీరంతా స్థానికంగా పెయింటింగ్ పని చేస్తూ జీవిస్తున్నారు. హత్య చేసేందుకు ఒప్పుకుంటే వారికి ఒక్కొక్కరికీ రూ.40,000 నుంచి రూ.1.5 లక్షల వరకూ ఇస్తానని అక్బర్ చెప్పాడు.

ఇందుకు వారంతా సరే అన్నారు. రెండు నెలల నుంచి అప్సర్.. రాహుల్​ను అనుసరిస్తున్నాడు. ఈ విషయాలు షాబాజ్‌, ఇర్ఫాన్​లకు చెబుతూ వస్తున్నాడు. హత్యకు ఇర్ఫాన్ ఆయుధాలు సమకూర్చాడు. రాహుల్​ను నేరుగా ఎదుర్కొంటే ప్రమాదమని.. షాబాజ్ పెప్పర్ స్ప్రే తెచ్చాడు. గత నెల 29న సాయంత్రం రాహుల్ ఇంటి నుంచి బయటకు వచ్చిన విషయాన్ని తెలుసుకున్న నిందితులు జిమ్‌ సమీపంలో క్వాలిస్‌ వాహనంలో వేచి చూశారు. చివరి నిమిషంలో భయంతో అప్సర్ మాత్రం హత్యలో పాల్గొనలేదు.

కానీ ఇర్ఫాన్, షాబాజ్‌, మాజిద్​లు.. రాహుల్ కోసం సెల్లార్​లో అతని ద్విచక్ర వాహనం వద్ద కాపు కాచారు. ఓ వ్యక్తి క్వాలిస్ వాహనంలో బయట సిద్ధంగా ఉండగా.. మరో వ్యక్తి ద్విచక్ర వాహనంపై సిద్దంగా ఉన్నాడు. రాహుల్​ సెల్లార్​లోకి రాగానే.. షాబాజ్ అతని కంట్లో పెప్పర్ స్ప్రేను చల్లాడు. దీంతో భయంతో రాహుల్ అక్కడే ఉన్న వాచ్‌మెన్ వెనుక దాక్కున్నాడు. ఈ క్రమంలోనే ఇర్ఫాన్‌, మాజిద్, షాబాజ్​లు.. రాహుల్​పై విచక్షణారహితంగా దాడి చేసి హతమార్చారు. వెంటనే అక్కడి నుంచి పరారయ్యారు.

ఈ ఘటనపై ప్రత్యేక బృందాలను రంగంలోకి దింపిన పోలీసులు.. వినోద్​సింగ్, గోపీసింగ్​తో పాటు.. అక్బర్ అండ్ గ్యాంగ్​ను అరెస్ట్ చేశారు. ఈ కేసులో మొత్తం 8 మందిని అరెస్ట్ చేసిన పోలీసులు.. వారి నుంచి రెండు ద్విచక్ర వాహనాలు, ఒక క్వాలిస్ వాహనం, హత్యకు ఉపయోగించిన మారణాయుధాలు, రూ.1.5 లక్షల నగదు స్వాధీనం చేసుకున్నారు. నిందితులను కస్టడీలోకి తీసుకుని మరింత లోతుగా విచారిస్తామని రాజేంద్రనగర్ డీసీపీ జగదీశ్వర్​రెడ్డి తెలిపారు. ఇలాంటి చర్యలకు పాల్పడిన నిందితులకు త్వరగా శిక్షపడేలా కృషి చేస్తామని ఆయన పేర్కొన్నారు.