EU New Law For Chargers : స్మార్ట్ ఫోన్లు, ట్యాబ్లెట్లు, స్మార్ట్ వాచెస్ వంటి ఎలక్ట్రానిక్ పరికరాల విషయంలో చాలా మందికి ఎదురయ్యేది ఛార్జింగ్ సమస్య. ఇంటి నుంచి ఆఫీసుకు లేదా ప్రయాణాలు చేసేటప్పుడు సొంత ఛార్జర్ తీసుకెళ్లకపోతే ఇబ్బంది పడాల్సి వస్తుంది. మీ గాడ్జెట్కు సరిపోయే కేబుల్ వేరేవాళ్ల దగ్గర దొరక్కపోతే ఇబ్బంది పడతారు. అలాంటి సమస్యలకు చెక్ పెట్టేందుకు యూరోపియన్ యూనియన్ ఓ చట్టాన్ని తీసుకొచ్చింది. అది తాజాగా అమల్లోకి వచ్చింది.
ఇకపై టైప్-సి పోర్ట్ మాత్రమే
మొబైల్ ఫోన్లు, ట్యాబ్లెట్లు ఇలా ఏ డివైజ్కు అయినా యూఎస్బీ టైప్-సి పోర్ట్ ఉండే ఛార్జర్ మాత్రమే ఉండాలని యూరోపియన్ పార్లమెంట్‌ ఓ చట్టాన్ని కొన్నాళ్ల క్రితం తీసుకొచ్చింది. ఈ ఏడాది డిసెంబరు 28 నుంచి ఇది అమల్లోకి వచ్చింది. దీంతో యూరోపియన్ యూనియన్ దేశాల్లో ఏ డివైజ్ కొనుగోలు చేసినా యూఎస్బీ టైప్-సి ఛార్జర్నే ఇస్తున్నారు. ప్రపంచవ్యాప్తంగా కూడా ఈ నిర్ణయం త్వరలో అమల్లోకి వచ్చే అవకాశం ఉంది.
ఈయూలో అమలు
ఈ ఏడాది డిసెంబర్ 28 నుంచి మొబైల్ ఫోన్లు, టాబ్లెట్లు, డిజిటల్ కెమెరాలు, హెడ్‌ ఫోన్లు, హెడ్‌ సెట్లు, వీడియో గేమ్ కన్సోల్స్, పోర్టబుల్ స్పీకర్లు, ఈ-రీడర్లు, కీబోర్డు, మౌస్, పోర్టబుల్ నావిగేషన్ సిస్టమ్‌ ఇలాంటి అన్ని ఎలక్ట్రానిక్ డివైజ్లకు యూఎస్బీ టైప్-సి ఛార్జర్నే అందిస్తున్నారు. ఈయూలో అమ్మకాలు జరిపే ఏ కంపెనీ అయినా ఎలక్ట్రానిక్ గ్యాడ్జెట్స్కు తప్పనిసరిగా యూఎస్బీ టైప్-సి ఛార్జర్ను ఇవ్వాలి. లేదంటే ఈయూలో అమ్మకాలు జరపడానికి అనుమతి లేదు. ఈ-వేస్ట్ను తగ్గించడం, వినియోగదారులకు సౌకర్యం కల్పించే ఉద్దేశంతో ఈయూ ఈ నిర్ణయం తీసుకుంది.
యాపిల్కు దెబ్బ!
అయితే ఈయూ తీసుకున్న ఈ నిర్ణయం వల్ల పోటీ కంపెనీలతో పోలిస్తే యాపిల్పై తీవ్ర ప్రభావం పడనుంది. ఆ కంపెనీ ప్రస్తుతం తమ స్మార్ట్ ఫోన్లకు లైటెనింగ్‌ పోర్ట్ను వినియోగిస్తోంది. తొలుత అన్ని డివైజ్లకు యూఎస్బీ టైప్-సి పోర్ట్ ఉండాలన్న ఈయూ నిర్ణయాన్ని యాపిల్ తీవ్రంగా వ్యతిరేకించింది. ఆ తర్వాత లైటెనింగ్‌ పోర్ట్ స్థానంలో యూఎస్బీ టైప్-సి పోర్ట్ను తీసుకొచ్చేందుకు సన్నాహాలు ప్రారంభించింది. యాపిల్ ఐఫోన్ 14 తర్వాత విడుదల చేసిన మోడళ్లలో టైప్-సి పోర్ట్ను తీసుకొచ్చింది. దాంతో ఐఫోన్ 15తోపాటు తదుపరి మోడళ్లకు ఈ సమస్య లేదు.
ఈయూ అన్ని మొబైళ్లలో ప్రామాణికంగా యూఎస్బీ టైప్-సి పోర్ట్ తో ఉన్న ఛార్జింగ్ సదుపాయం ఉండాలనేలా నిబంధనలు తీసుకొచ్చింది. కానీ ప్రస్తుతం అధికారికంగా వాడుకలో ఉన్న ఐఫోన్ 14, ఐఫోన్ ఎస్‌ఈ ఫోన్లలో ప్రత్యేకంగా యాపిల్ ఛార్జింగ్ పోర్ట్ ఉంటుంది. ఇది యూరప్‌ నిబంధనలకు విరుద్ధం. దాంతో స్థానికంగా ఈ మోడళ్ల అమ్మకాలను యాపిల్ నిలిపివేయాల్సి వచ్చింది.
ఈయూ నిర్ణయం వల్ల లాభాలు
బ్రాండ్తో సంబంధం లేకుండా అన్ని డివైజ్లు యూఎస్ బీ టైప్-సి పోర్ట్తో ఛార్జ్ అవుతాయి. దీంతో వినియోగదారుడికి సౌలభ్యంగా ఉంటుంది. అలాగే వినియోగదారుడికి డబ్బులు పొదుపు అవుతాయి. అంతేకాకుండా ఈ-వ్యర్థాలు తగ్గుతాయి. దీంతో పర్యావరణం దెబ్బతినకుండా ఉంటుంది.
బస్సులు, రైల్వే స్టేషన్లలో మొబైల్ ఛార్జ్ చేస్తున్నారా? మీ ప్రైవేట్ డేటా లీక్ అయ్యే ఛాన్స్!
