No Sports Facilities In Telangana University: ప్రతి యూనివర్సిటీకి స్పోర్ట్స్ బోర్డు తప్పనిసరిగా ఉండాలి. ఆ బోర్డు ద్వారా విద్యార్థుల్లో క్రీడా నైపుణ్యం పెంచి.. స్ఫూర్తి నింపే కార్యకలాపాలు కొనసాగించాల్సి ఉంటుంది. నిజామాబాద్‌ జిల్లా డిచ్‌పల్లిలోని తెలంగాణ విశ్వవిద్యాలయం ఏర్పడి 16 ఏళ్లు గడిచిపోయిన తర్వాత స్పోర్ట్స్ బోర్డు ఏర్పాటు చేశారు. బోర్డు అందుబాటులోకి వచ్చి 10 నెలల పైనే అవుతున్నా.. ఒక్క సమావేశమైనా జరగలేదు. క్రీడల అభివృద్ధికి ఎలాంటి కార్యకలాపాలు నిర్వహించలేదు. ఇటీవల విద్యార్థుల ఆందోళనలతో డైరెక్టర్‌ను మార్చడం తప్ప ఎలాంటి పురోగతి లేదు.
యూజీసీ నిబంధనల ప్రకారం 20 నుంచి 30 ఎకరాల్లో క్రీడా మైదానాలు ఉండాలి. తెలంగాణ విశ్వవిద్యాలయం 577 ఎకరాల విస్తీర్ణంలో ఉన్నప్పటికీ.. ఒక్క మైదానం కూడా యూజీసీ నిబంధనల ప్రకారం లేకపోవడం దురదృష్టకరం. మామూలు మైదానమే క్రీడాకారులకు దిక్కయింది. స్టేడియం, జిమ్, క్రీడా పరికరాలు సమకూర్చాలని ఉన్నతాధికారులతో మొర పెట్టుకుని విద్యార్థులు అలిసిపోయారు.
Telangana University In Nizamabad: తెలంగాణ యూనివర్సిటీకి ఒకే ఒక్క ఫిజికల్ డైరెక్టర్ దిక్కయ్యారు. ఆ ఒక్కరూ ఒప్పంద పద్ధతిలో నియామకం అయ్యారు. అమ్మాయిలకు క్రీడల్లో ప్రోత్సాహం లేదు. గేమ్స్ ఇంఛార్జ్‌గా ఫిజికల్ ఎడ్యుకేషన్‌కు సంబంధించిన అధికారే ఉండాల్సి ఉండగా.. ఇక్కడ మాత్రం అధ్యాపకులు బాధ్యతలు నిర్వహిస్తున్నారు. విద్యార్థులు ఆందోళన చేసినప్పుడే క్రీడా వసతులు, పరికరాల గురించి హామీలిచ్చి చేతులు దులుపుకుంటున్నారు. తెలంగాణ విశ్వవిద్యాలయంలో బీపెడ్ కోర్సును అందుబాటులోకి తేవాలని.. అలాగైనా కనీసం వర్సిటీ మైదానం అభివృద్ధి చెందుతుందని విద్యార్థులు అభిప్రాయపడుతున్నారు.
ఎటుచూసినా యూనివర్సిటీ క్రీడా మైదానం ఒక సాధారణ గ్రౌండ్ లాగా కనిపిస్తోందని విద్యార్థులు వాపోయారు. ఎవరు ఈ విషయంపై పట్టించుకోవడం లేదన్నారు. ఎన్ని రకాలుగా వినతులు, ధర్నాలు చేసిన అప్పటి వరకు మాత్రమే.. అప్పడు ఏదో నామమాత్రంగానే బాగు చేస్తారు. మళ్లీ ఆ తర్వాత పరిస్థితి సాధారణమే. వీసీ తీరు విస్మయానికి గురిచేస్తుందని ఆవేదన వ్యక్తం చేశారు.
"జిల్లాలో ఉన్న ఎమ్మెల్యేలు, వీసీ యూనివర్సిటీలో ఉన్న గ్రౌండ్ను పట్టించుకోవడం లేదు. అలాగే స్పోర్ట్స్ డిపార్టుమెంట్లో ముగ్గురు మాత్రమే ఉద్యోగులు ఉన్నారు. యూనివర్సిటీలోని ఇన్ని వందల మంది విద్యార్థులకు ఒక్క పీఈటీ ఏం సరిపోతారు. ఎటువంటి స్పోర్ట్స్, జిమ్ ఎక్యూప్మెంట్లు లేవు. ఎన్ని విన్నపాలు చేసిన, ఎన్ని లెటర్లు ఇచ్చినా, ధర్నాలు చేసినా తు.తు. మంత్రంగానే చర్యలు ఉంటున్నాయి. ఎమ్పెడ్, బీపెడ్కు సంబంధించిన కోర్సులు తీసుకొని రావాలి." - విద్యార్థులు
ఇవీ చదవండి:
