నల్గొండను కాంగ్రెస్ కంచుకోటగా మార్చడంలో కీలక పాత్రధారి - కోమటిరెడ్డి వెంకట్​రెడ్డి ప్రస్థానమిదీ

Nalgonda MLA Komati Reddy Venkat Reddy Profile : రాష్ట్ర రాజకీయాల్లో ఆయనో సంచలనం. ప్రత్యర్థి పార్టీ నాయకుల గుండెల్లో ఆయనొక సింహస్వప్నం. విద్యార్థి దశ నుంచే రాజకీయాల్లో చురుగ్గా ఉంటూ, అనతి కాలంలోనే యువజన కాంగ్రెస్‌తో తన రాజకీయ జీవితాన్ని ప్రారంభించి ధీరుడుగా ఎదిగిన వైనం ఆయన సొంతం. పట్నం నుంచి ప్రతి పల్లె దాకా, పేరు పెట్టి పిలవగలిగేంత చనువు, ఆదరణ ఉండటం ఆయన ఆత్మీయతకు నిదర్శనం. సకల జనుల సమ్మెకు మద్దతుగా తన మంత్రి పదవికి సైతం రాజీనామా చేసి, ఆమరణ దీక్షకు దిగిన చరిత్ర ఆయనది. ఇంతకీ ఆయన ఎవరనుకుంటున్నారా? ఆయనే ఉద్యమాల పురిటిగడ్డ ఉమ్మడి నల్గొండ వాసి కోమటిరెడ్డి వెంకట రెడ్డి. ప్రస్తుత కేబినెట్​లో పురపాలక శాఖ మంత్రిగా అవకాశం దక్కించుకున్న కోమటిరెడ్డి వెంకట్​రెడ్డిపై ప్రత్యేక కథనం.

Nalgonda MLA Komati Reddy Venkat Reddy Profile : తెలంగాణ కాంగ్రెస్​లోని సీనియర్​ నాయకుల్లో కోమటిరెడ్డి వెంకట్ రెడ్డి ఒకరు. రాష్ట్రంలో కాంగ్రెస్ పార్టీ క్రమంగా ఖాళీ అవుతున్నా, తోటి నాయకులు తమ స్వార్థం కోసం పార్టీ మారుతున్నా ఎన్నడూ తన విధేయతను చెదరనీయక కోమటి రెడ్డి కాంగ్రెస్ పార్టీలో కొనసాగారు. ఉమ్మడి నల్గొండ కాంగ్రెస్​కు కంచుకోటగా మారిందంటే దాని వెనకాల కోమటి రెడ్డి కృషి ఎంతో ఉందని చెప్పటంలో ఎలాంటి అతిశయోక్తి లేదు. విద్యార్థి నాయకుడిగా రాజకీయాల్లోకి వచ్చి రాష్ట్ర నాయకుడుగా ఎదిగిన కోమటిరెడ్డి జీవితం ఎందరికో ఆదర్శం.

Nalgonda MLA Komati Reddy Venkat Reddy Life Story : కోమటిరెడ్డి వెంకట రెడ్డి స్వస్థలం నల్గొండ జిల్లా నార్కట్​పల్లి మండలంలోని బ్రాహ్మణ వెల్లెంల గ్రామం. ఆయన 23 మే 1963న సుశీలమ్మ, పాపిరెడ్డి దంపతులకు 8వ సంతానంగా జన్మించారు. వీరిది వ్యవసాయ(Agriculture) ఆధారిత కుటుంబం. వెంకట్ రెడ్డికి రాజగోపాల్ రెడ్డి అనే తమ్ముడు కూడా ఉన్నాడు. కోమటిరెడ్డి వెంకట్ రెడ్డి 1980లో హైదరాబాద్‌లోని మలక్‌పేట్‌లోని అమరజీవి పొట్టి శ్రీరాములు హైస్కూల్‌లో పదవ తరగతి చదివారు. తరువాత అతను పాతర్‌గట్టి ఎన్​బీ నుంచి ఇంటర్మీడియట్ పూర్తి చేసారు. చిన్నప్పటి నుంచి చదువులో చురుగ్గా ఉన్న కోమటిరెడ్డి హైదరాబాద్​లో ఉన్న ప్రఖ్యాత చైతన్య భారతి ఇన్‌స్టిట్యూట్ ఆఫ్ టెక్నాలజీ కాలేజీలో బ్యాచిలర్స్ ఆఫ్ సివిల్ ఇంజినీరింగ్ అభ్యసించారు. కానీ పలు అనివార్య కారణాల వల్ల ఇంజినీరింగ్ పూర్తి చేయలేకపోయారు.

ఇంజినీరింగ్ చదువుతున్న కాలంలోనే కోమటిరెడ్డి రాజకీయాలకు ఆకర్షితుడయ్యాడు. ఆ రోజుల్లో రాజీవ్ గాంధీని ఆదర్శంగా తీసుకుని యూత్ కాంగ్రెస్​లో చేరారు. కాలేజీలో ఉన్న సమయంలోనే యూత్ కాంగ్రెస్ అధ్యక్షుడుగా ఎన్నికయ్యాడు. అప్పుడే లక్ష్మీ అనే అమ్మాయితో వివాహం జరిగింది. వీరికి ఇద్దరు సంతానం. కుమారుడు ప్రతీక్ రెడ్డి, కుమార్తె శ్రీనిధి. కుమారుడు 20 డిసెంబర్ 2011న హైదరాబాద్‌లోని ఔటర్ రింగ్ రోడ్డులో ప్రమాదానికి గురై చనిపోయాడు.

తన కుమారుడు ప్రతీక్ రెడ్డి జ్ఞాపకార్థం కోమటిరెడ్డి ప్రతీక్ ఫౌండేషన్‌ని స్థాపించారు. ఫౌండేషన్ ద్వారా రూ. 3.5 కోట్ల వ్యయంతో, అతను నల్గొండలో ప్రతీక్ మెమోరియల్ ప్రభుత్వ జూనియర్ కళాశాల, ఒకేషనల్ జూనియర్ కళాశాల భవనాన్ని నల్గొండలో చేపట్టారు. అతను ఈ సంస్థ క్రింద అంబులెన్స్ సేవలను నిర్వహిస్తున్నారు. అంతేకాకుండా తన కుమారుడులా ఎవరు రోడ్డు ప్రమాదాలకు గురవుకూడదని, రహదారి భద్రత(Road safety) కోసం అవగాహన ప్రచారాలను నిర్వహిస్తున్నారు. ప్రతి సంవత్సరం, కోమటిరెడ్డి ప్రతీక్ ఫౌండేషన్ జాబ్ మేళాను నిర్వహించి అనేక మంది నిరుద్యోగ యువతకు ఉద్యోగ అవకాశాలను అందిస్తున్నారు.

Komati Reddy Venkat Reddy Political Journey : నల్గొండ జిల్లా యూత్ కాంగ్రెస్ అధ్యక్షుడుగా ఎన్నికతో కోమటిరెడ్డి పూర్తి స్థాయి రాజకీయాల్లోకి వచ్చారు. యూత్ కాంగ్రెస్ అధ్యక్షుడుగా నాటి టీడీపీ ప్రభుత్వ తప్పిదాలపై పోరాడారు. 1999 అసెంబ్లీ ఎన్నికల్లో తొలిసారి కోమటి రెడ్డి ఎమ్మెల్యేగా పోటీ చేశారు. ఈ ఎన్నికల్లో సమీప సీపీఎం అభ్యర్థి నంద్యాల నరసింహా రెడ్డిపై 4000 పైచిలుకు ఓట్ల మెజారిటీతో గెలుపొందారు. అప్పటివరకు కమ్యూనిస్టుల కంచుకోటగా ఉన్న నల్గొండను కాంగ్రెస్ అడ్డాగా మార్చడంలో కోమటి రెడ్డి కీలక పాత్ర పోషించారు.

అటు పార్టీని పటిష్ఠం చేస్తూనే తనదైన స్టైల్​లో అభివృద్ధి కార్యక్రమాలను కూడా చేపట్టారు. దీంతో మరల 2004 సంవత్సరంలో జరిగిన శాసనసభ ఎన్నికల్లో కోమటిరెడ్డి విజయం నల్లేరుపై నడకయ్యింది. ఆ ఎన్నికల్లో టీడీపీ అభ్యర్థి గుత్తా సుఖేందర్ రెడ్డిపై 22000 భారీ మెజారిటీతో విజయపంథాలో దూసుకుపోయారు. ఆ ఎన్నికల్లో కాంగ్రెస్ పార్టీ అధికారంలోకి వచ్చింది. దీంతో రెట్టింపు ఉత్సాహంతో నియోజకవర్గంలో అభివృద్ధి పనులను చేపట్టి పూర్తి చేశారు.

Komati Reddy Venkata Reddy is Congress Candidate in Nalgonda : నల్గొండను దశాబ్దాలుగా పట్టిపీడుస్తున్న తాగునీటి సమస్య పోవడానికి ఊరూరా శుద్ధనీటి ప్లాంట్​లను ఏర్పాటు చేశారు. ప్రభుత్వ సంక్షేమ ఫలాలన్నీ పేదలకు అందేలా తనవంతు కృషి చేశారు. ఈ దెబ్బకు 2009వ సంవత్సరం జరిగిన అసెంబ్లీ ఎన్నికల్లో హ్యాట్రిక్ విజయం(Hattrick Win) కైవసం చేసుకున్నారు. ఈ పోరులో మరల తన సమీప ప్రత్యర్థిగా సీపీఎం అభ్యర్థి నంద్యాల నరసింహా రెడ్డిపై గెలుపు బావుటా ఎగురవేశారు. వరుసగా మూడు సార్లు ఎమ్మెల్యేగా గెలుపొందటంతో కోమటిరెడ్డికి మంత్రి పదవి వరించింది.

రెండోసారి ముఖ్యమంత్రి అయిన డా. వై.ఎస్. రాజశేఖర్ రెడ్డి తన మంత్రివర్గంలో చోటు కల్పించారు. దీంతో ఐటీ మంత్రిగా ప్రమాణం స్వీకారం చేశారు. రాష్ట్రంలో ఐటీ కంపెనీలను తీసుకు రావడానికి కోమటిరెడ్డి ఎంతగానో కృషి చేశారు. ఐటీ పెట్టుబడులతో యువతకు ఉపాధి కల్పించాలని ఎంతగానో సంకల్పించారు. మంత్రి కోమటిరెడ్డి కృషి రాష్ట్ర నాయకుడుగా ఎదిగేలా చేసింది. అతను 2010లో తెలంగాణా వాదానికి మద్దతుగా తన మంత్రిత్వ శాఖ, తన అసెంబ్లీ స్థానానికి రాజీనామా చేసారు. అయినప్పటికీ 2011 అక్టోబరులో కాంగ్రెస్ ప్రభుత్వం తన ఎమ్మెల్యే పదవికి రాజీనామాను ఆమోదించడానికి నిరాకరించింది.

పదవుల త్యాగం తరవాత 2011 నవంబర్ 1న నల్గొండ జిల్లాలో నిరాహర దీక్ష మొదలుపెట్టారు. దీక్ష చేపట్టిన తొమ్మిది రోజుల తరవాత పోలీసులు దీక్షను భగ్నం చేశారు. అయితే తెలంగాణ ప్రత్యేక రాష్ట్ర సాధనకోసం నిరాహర దీక్ష చేపట్టిన తొలి నాయకుడుగా కోమటిరెడ్డి వెంకట్ రెడ్డిని గుర్తిస్తారు. తరువాత ఎన్నికల్లో స్వతంత్ర అభ్యర్థి కంచర్ల భూపాల్ రెడ్డిపై పదివేల పైచిలుకు ఓట్ల మెజారిటీతో గెలుపొందారు. ఈ ఎన్నికల్లో టీఆర్ఎస్ పార్టీ అధికారంలోకి వచ్చింది. దీంతో ప్రతిపక్షనేతగా కోమటిరెడ్డి గళం విప్పారు. నిత్యం ప్రభుత్వానితో పోరాడుతూ కంటిమీద కునుకులేకుండా చేశారు.

Komati Reddy Political Controversies : సుధీర్ఘ కోమటిరెడ్డి రాజకీయ జీవితంలో కొన్ని వివాదాలు కూడా చోటుచేసుకున్నాయి. తెలంగాణ తొలి శాసన మండలి ఛైర్మన్ స్వామి గౌడ్​పై హెడ్ ఫోన్ విసరడంతో ఆయన కంటికి గాయమైంది. ఈ ఘాతుకానికి పాల్పడిన కోమటిరెడ్డిపై స్పీకర్ మధుసూదనా చారి అసెంబ్లీ నుంచి సస్పెండ్ చేశారు. 2014 తరవాత నాటి ముఖ్యమంత్రి కేసీఆర్(KCR) ఆపరేషన్ ఆకర్ష్ పేరిట ఎందరో కాంగ్రెస్ నాయకులను టీఆర్ఎస్​లో చేర్చుకున్నారు. ఈ సమయంలో ఎంతోమంది కాంగ్రెస్ పార్టీ నాయకులు పార్టీని వీడినా, కోమటి రెడ్డి మాత్రం కాంగ్రెస్​లోనే ఉంటూ పార్టీ పట్ల తనకున్న నిబద్ధతను చాటుకున్నారు.

ఈ నేపథ్యంలో 2018 లో జరిగిన ముందస్తు ఎన్నికల్లో కోమటిరెడ్డి ఐదోసారి నల్గొండ నుంచి ఎమ్మెల్యేగా పోటీ చేసి మొదటిసారి ఓటమి పాలయ్యారు. ఈ ఎన్నికల్లో టీఆర్ఎస్ అభ్యర్థి కంచర్ల భూపాల్ రెడ్డి 22000 మెజారిటీతో విజయం సాధించారు. ఈ ఎన్నికల్లో ఆయన సోదరుడు రాజగోపాల్ రెడ్డి మునుగోడు నియోజకవర్గం నుంచి గెలుపొందారు. అయితే 2019 లో జరిగిన లోక్​సభ ఎన్నికల్లో కోమటిరెడ్డి భువనగిరి నుంచి పోటీ చేసి టీఆర్ఎస్ అభ్యర్థి బుర్రా నరసయ్యపై 5000 ఓట్ల స్వల్ప మెజారిటీతో గెలుపొందారు. ఆ సమయంలోనే రాష్ట్రం పీసీసీ అధ్యక్షుడుగా ఉత్తమ్ కుమార్ రెడ్డి రాజీనామా(Resign) చేశారు. ఈ సమయంలో పీసీసీగా కోమటికి పదవి వరిస్తాడని అంతా అనుకున్నా రేవంత్ రెడ్డికి ఆ పదవి వరించింది.

Telangana Assembly Election Results 2023 : తెలంగాణ అసెంబ్లీ ఎన్నికలు 2023 ఫలితాల్లో నల్గొండ స్థానం నుంచి కోమటిరెడ్డి వెంకట్ రెడ్డి మళ్లీ బరిలోకి దిగి 1,07,405 మెజార్టీతో కంచర్లపై గెలుపొందారు. ఈ దఫా రాష్ట్రంలో కాంగ్రెస్ అధికారంలోకి వచ్చింది. మరో విశేషమేమిటంటే నల్గొండ జిల్లాలోని 12 నియోజకవర్గాలకు గానూ 11 స్థానాలను హస్తం కైవసం చేసుకుంది. ప్రస్తుత మంత్రివర్గంలో చోటు దక్కించుకున్న కోమటిరెడ్డి వెంకట్​రెడ్డి పురపాలక శాఖ మంత్రిగా ఛాన్స్​ కొట్టేశారు.