మహబూబాబాద్ జిల్లా మరిపెడ, కురవిలో తెరాస ఆధ్వర్యంలో పట్టభద్రుల ఎమ్మెల్సీ ఎన్నికల సన్నాహ సమావేశాలు జరిగాయి. ఇందులో తెరాస ఎమ్మెల్సీ అభ్యర్థి పల్లా రాజేశ్వర్ రెడ్డి, మంత్రులు ఎర్రబెల్లి దయాకర్రావు, సత్యవతి రాఠోడ్లు, మహబూబాబాద్ ఎంపీ కవిత, ఎమ్మెల్యే రెడ్యానాయక్ పాల్గొన్నారు. దేశంలో ఎక్కడా లేని విధంగా సంక్షేమ పథకాలను ప్రవేశపెట్టిన ఘనత సీఎం కేసీఆర్దేనని మంత్రి ఎర్రబెల్లి దయాకర్రావు పేర్కొన్నారు. రుణమాఫీ, నిరుద్యోగ భృతి, సొంత స్థలాల్లో ఇళ్ల నిర్మాణాలను రానున్న మూడేళ్లలో అమలు చేస్తామన్నారు. మార్చిలో పెట్టనున్న బడ్జెట్లో 2 పెద్ద పథకాలను ప్రవేశపెట్టనున్నట్లు ఎర్రబెల్లి స్పష్టం చేశారు. రైతులకు భాజపా, కాంగ్రెస్‌లు ఏమీ చేయలేదని ఎద్దేవా చేశారు. పెట్రో ధరలు పెంచి ప్రజలపై భారాన్ని మోపుతున్నారని ఎర్రబెల్లి విమర్శించారు. నల్గొండ-వరంగల్-ఖమ్మం పట్టభద్రుల నియోజకవర్గ ఎమ్మెల్సీగా పల్లా రాజేశ్వర్రెడ్డిని గెలిపించాలని కోరారు.
త్వరలో జరగనున్న పట్టభద్రుల ఎమ్మెల్సీ ఎన్నికల్లో డోర్నకల్ నియోజకవర్గంలో తెరాస బలాన్ని చూపించాలని మంత్రి సత్యవతి రాఠోడ్ అన్నారు. ఎన్నికల కోసమే కాంగ్రెస్ వాళ్లు వస్తున్నారని ఎద్దేవా చేశారు. తెరాస ప్రభుత్వం చేసిన అభివృద్ధితో ఎండాకాలంలో కూడా చెరువులు, కుంటలు అలుగులు పోస్తున్నాయన్నారు. కేంద్ర ప్రభుత్వం బయ్యారం ఉక్కు పరిశ్రమను, గిరిజన యూనివర్సిటీ ఏర్పాటును విస్మరించిందన్నారు. ఈ ఎన్నికల్లో భాజపాకు బుద్ధి చెప్పాలన్నారు. ఉద్యోగాల భర్తీలో లెక్కలు తప్పని నిరూపిస్తే ఎన్నికల నుంచి తప్పుకుంటానని పల్లా రాజేశ్వర్‌రెడ్డి సవాల్ విసిరారు.
ఇదీ చదవండి: రాష్ట్రానికి మరోసారి స్కోచ్‌ అవార్డులు.. ఉత్తమ మంత్రిగా కేటీఆర్
