పార్లమెంటు ఎన్నికల వరకు కొనసాగనున్న తనిఖీలు

మహబూబాబాద్ జిల్లా కేంద్రంలో పోలీసులు నిర్భంద తనిఖీలు నిర్వహించారు. సరైన పత్రాలు లేని వాహనాలను, సామగ్రిని స్వాధీనం చేసుకున్నారు. ఈ సోదాలు పార్లమెంటు ఎన్నికల వరకు కొనసాగుతాయని అధికారులు వెల్లడించారు.

మహబూబాబాద్ జిల్లా కేంద్రంలో ఎస్పీ కోటిరెడ్డి ఆధ్వర్యంలో 150 మంది పోలీసులు, కేంద్ర బలగాలు కలిసి నిర్భంద తనిఖీలు నిర్వహించారు. నందమూరి నగర్, యాదవ నగర్, జగన్ కాలనీ, బాబా గుట్ట.. తదితర కాలనీల్లో విస్తృత సోదాలు చేపట్టారు.

సరైన పత్రాలు లేని వస్తువులు స్వాధీనం

సరైన పత్రాలు లేని 20 ద్విచక్రవాహనాలు, రెండు ఆటోలు, 3ఇసుక ట్రాక్టర్లు, మూడు లక్షల విలువచేసే టేకు కలప, మద్యం సీసాలు, గుట్కా ప్యాకెట్లు, గుడుంబా తదితర సామగ్రిని స్వాధీనం చేసుకుని కేసులు నమోదు చేశారు.

ఎన్నికల వరకు సోదాలు కొనసాగింపు

గ్రామపంచాయతీ, శాసనసభ ఎన్నికలు సవ్యంగా జరిగాయని...పార్లమెంటు ఎన్నికలను కూడా ప్రశాంత వాతావరణంలో జరుపుకోవాలని ఎస్పీ కోటిరెడ్డి గ్రామస్థులను కోరారు. ఎన్నికల వరకు ఈ సోదాలు కొనసాగుతాయన్నారు.