కుమురంభీం ఆసిఫాబాద్ జిల్లా రెబ్బెన మండలంలోని గోలేటి ప్రాంతంలోని రేషన్ దుకాణం డీలర్ విజయ తనకు బియ్యం ఇవ్వడం లేదని రమేశ్ అనే లబ్ధిదారుడు ఆరోపించాడు. జిల్లా పాలనాధికారి, రెబ్బెన తహసీల్దార్కు అతను ఫిర్యాదు చేసినట్టు తెలిపాడు. తాను కూలీ పని నిమిత్తం మాదారంలో నివాసం ఉంటున్నానని బియ్యం తీసుకోడానికి వస్తే అతనికి బదులు అంతకుముందే బియ్యాన్ని వేరే వాళ్లు తీసుకున్నట్టుందని అతను వాపోయాడు.
ఇదే తరహాలో గోలేటికి మరో కుటుంబంలోని ఒకరికి రేషన్ ఇవ్వలేదని వారు ఆరోపించారు. వారు కూలీపనుల నిమిత్తం బెల్లంపల్లిలో ఉంటున్నామని.. తమ కుటుంబంలో మొత్తం ఐదుగురు లబ్ధిదారులు ఉండగా కేవలం నలుగురికి 12 కిలోల చొప్పున బియ్యం ఇచ్చి.. ఇంకొకరికి ఇవ్వాల్సి ఉందని డీలర్ను అడగగా ఇచ్చేది లేదని డీలర్ విజయ అన్నారని వారు పేర్కొన్నారు.
ఫిర్యాదు అందుకున్న ఎన్ఫోర్స్మెంట్ డీటీ శ్యామ్లాల్.. గోలేటిలోని రేషన్ దుకాణాన్ని తనిఖీ చేశారు. పూర్తి దర్యాప్తు నిర్వహించి సమాచారాన్ని పౌరసరఫరాల అధికారులకు అందజేస్తామని.. తప్పొప్పులను పరిశీలించి తదుపరి చర్యలు తీసుకోనున్నట్టు ఆయన తెలిపారు.
ఇవీ చూడండి: లక్ష మంది రోగులకైనా చికిత్స: కేసీఆర్
