సాధారణ జ్వరం వచ్చినా రక్త, మూత్ర, తెల్లరక్త కణాల పరీక్షల పేరుతో సుమారు రూ.2500 వరకు ఖర్చు చేయాల్సి వస్తోంది. అంతకుమించిన సమస్యలొస్తే ఇక చెప్పాల్సిన పనిలేదు. వైద్య పరీక్షల విషయంలో పేదలను ఆదుకునేందుకు రాష్ట్ర ప్రభుత్వం అమల్లోకి తీసుకొచ్చిన తెలంగాణ నిర్ధారణ పరీక్షల పథకం ఉమ్మడి ఖమ్మం జిల్లాలో తెల్లబోతోంది. 52 రకాల రక్త, మూత్ర పరీక్షలే కాకుండా ఎక్స్‌రే, అల్ట్రాసౌండ్‌, సిటీ, ఎంఆర్‌ఐ స్కానింగ్‌ పరీక్షలను ఉచితంగా అందించేందుకు ఉపక్రమించిన ఈ కార్యక్రమం ఏడాది గడిచినా అమలుకు నోచుకోవడం లేదు.
లక్షల రూపాయలు వెచ్చించి
ఉమ్మడి ఖమ్మం జిల్లాలో తెలంగాణ నిర్ధారణ పరీక్షల పథకం నిర్వహణ కోసం నిర్మించిన భవనాలు నిరుపయోగంగా మారాయి. లక్షల రూపాయలు వెచ్చించి ఆరు నెలల క్రితమే హడావిడిగా నిర్మాణాలను పూర్తి చేసి బోర్డులు తగిలించారు. కానీ అందులో పరికరాలు మాత్రం అందుబాటులోకి రాలేదు. పరీక్షల నిర్వహణకు అవసరమైన సిబ్బంది నియామకానికి సైతం ఎలాంటి చర్యలు చేపట్టలేదు. 52 రకాల వైద్య పరీక్షలతోపాటు అధునాతన పరికరాలతో సామాన్యులకు సైతం అత్యున్నత సేవలందించే పరికరాలు కనిపించటం లేదు. అన్ని రకాల పరీక్షలు నిర్వహించాలంటే అందుకు సంబంధించిన నిపుణులైన సిబ్బంది తప్పనిసరి. ఆ విషయంలోనూ ఇప్పటికీ ఎలాంటి పురోగతి లేదు. ప్రయోగాత్మకంగా హైదరాబాద్‌ నగర పరిధిలో ప్రారంభించిన ఈ పథకం కింద రోజుకు దాదాపు 8వేల పరీక్షల ఫలితాలు వెల్లడించడం సంచలనం సృష్టించింది.
కోట్లలో భారం
వైద్య పరీక్షల ఖర్చులపై జరిగిన అనేక అధ్యయనాల్లో వెలువడిన వివరాల ఆధారంగా సగటున ఒక్కో కుటుంబానికి రోగ నిర్ధారణ ఖర్చు రూ.23వేల పైచిలుకే. ఈ లెక్కన వైద్య, ఆరోగ్య శాఖాధికారులు చూపిస్తున్న గణాంకాల ప్రకారమే భద్రాద్రి జిల్లాలో కోట్లాది రూపాయల భారాన్ని ప్రజలు భరిస్తున్నట్లు స్పష్టమవుతోంది. సాధారణ అనారోగ్య సమస్యలతోపాటు ఇతర కారణాలతో రోగ నిర్ధారణ వైద్య పరీక్షలు చేయించుకున్న వారికి అధికారిక లెక్కల ప్రకారం 2018లో దాదాపు రూ.62.59 కోట్ల వరకు ఆర్థిక భారం పడిందంటే పరిస్థితి అర్థం చేసుకోవచ్ఛు. అనధికారిక లెక్కల ప్రకారం జిల్లా వ్యాప్తంగా అనారోగ్యాలతో బాధపడుతుఉన్న వారి సంఖ్యానుసారంగా ఏడాదిలో వైద్య పరీక్షల నిమిత్తం సుమారు రూ.100 కోట్ల భారం పడుతుందనడంలో సందేహం లేదు.
వ్యాధి నిర్ధారణ పరీక్షల పథకం అమలుకు అవసరమైన భవనం ప్రభుత్వ ఏరియా ఆసుపత్రిలో నిర్మించారు. సమకూర్చాల్సిన సామగ్రి ఇంకా రాలేదు. పైగా విధులు నిర్వర్తించే సిబ్బంది నియామకాలు జరగలేదు. సామగ్రి, సిబ్బంది ఏర్పాటు అందుబాటులోకి వస్తే సేవలు ఉచితంగా సమకూరుతాయని డీసీహెచ్‌ఎస్‌ డాక్టర్‌ కోటిరెడ్డి పేర్కొన్నారు.
ఇదీ చూడండి : ఈటీవీ భారత్ యాప్లో కొత్త ఫీచర్స్
