TSPSC Town Planning Supervising Officer Paper Leak: పట్టణ భవన ప్రణాళిక పర్యవేక్షణ అధికారి, వెటర్నరీ అసిస్టెంట్ సర్జన్‌ పరీక్షలకు సంబంధిచిన పేపర్ లీకేజీ వ్యవహారం దుమారం లేపుతోంది. ఇప్పటికే ఈ కేసులో అనుమానితుడిగా ఉన్న ప్రవీణ్‌ను అదుపులోకి తీసుకుని విచారిస్తున్నారు. ప్రవీణ్ నుంచి పేపర్ కొనుగోలు చేశారనే ఆరోపణలు వచ్చిన 13మందిని అదుపులోకి పోలీసులు విచారిస్తున్నారు. కేసులో ప్రధాన నిందితుడుగా ఉన్న టీఎస్పీఎస్సీ ఉద్యోగి ప్రవీణ్‌తో పాటుగా పొరుగు సేవల ఉద్యోగి రాజశేఖర్ను అదుపులోకి తీసుకున్నారు.
ఈ కేసులో మరికొందరు పరారీలో ఉన్నట్లు పోలీసులు గుర్తించారు. ఇందుకోసం టాస్క్‌ఫోర్స్ పోలీసులు రంగంలోకి దించారు. హ్యాకింగ్‌ జరిగిందని టీఎస్పీఎస్సీ అధికారులు ఇచ్చిన ఫిర్యాదుతో... సైబర్‌ క్రైం పోలీసులు కూడా విచారణ కొనసాగిస్తున్నారు. సాంకేతిక ఆధారాలు సేకరిస్తున్నారు. టీఎస్పీఎస్సీ కార్యదర్శికి వ్యక్తిగత సహాయకుడిగా పనిచేస్తున్న ప్రవీణ్ విచారణలో పలు విషయాలు పోలీసులకు తెలిసినట్లు సమాచారం.
TSPSC Veterinary Assistant Surgeon Paper Leak: ముగ్గురు దళారులతో కలిసి పేపర్ లీకేజీకి కుట్రపన్నాడని ఇందుకోసం 10 లక్షల రూపాయల ఒప్పందం కుదుర్చుకున్నట్లు పోలీసులకు ప్రాథమికంగా తెలిసింది. పోలీసులు అప్రమత్తం చేయడంతో టీఎస్పీఎస్సీ పరీక్షల్ని నిలిపి వేసింది. పేపర్ లీక్ అయిందని ఓ అభ్యర్థి పోలీసులకు సమాచారం ఇవ్వగా బేగంబజార్ పోలీసులు టీఎస్పీఎస్సీ అధికారుల దృష్టికి తీసుకెళ్లారు. తనిఖీ చేసిన అధికారులు వెంటనే పరీక్షను నిలిపివేశారు.
టీఎస్పీఎస్సీకి సంబంధించిన వెబ్‌సైట్ లాగిన్ వివరాలు.. సంబంధిత అధికారి వద్ద చాలా భద్రంగా ఉంటాయి. ఆ లాగిన్ వివరాలతోనే సర్వర్ నుంచి పేపర్లు తస్కరించి ఉండొచ్చని అనుమానాలు వ్యక్తమవుతున్నాయి. ఈ వ్యవహారంపై కేసు నమోదు చేసిన బేగంబజార్ పోలీసులు దర్యాప్తు ముమ్మరం చేశారు. మొత్తం ఎంత మంది నిందితులు ఉన్నారనే వివరాలను త్వరలోనే వెల్లడిస్తామన్నారు. కొందరు పరారీలో ఉన్నట్లు తెలుస్తోంది. డీసీపీ స్థాయి అధికారి పర్యవేక్షణలో ఈ కేసు దర్యాప్తు కొనసాగుతోంది.
TSPSC computers hacked: మరోవైపు టీఎస్పీఎస్ఎస్సీ పేపర్ లీకేజీపై అభ్యర్థులు ఆందోళన వ్యక్తం చేస్తున్నారు. చాలా ఏళ్లుగా కష్టపడి చదివి చివరకు పరీక్షలకు హాజరైన సమయంలో ఇలా జరగడం పట్ల విచారం వ్యక్తం చేస్తున్నారు. ఈ కేసుతో సంబంధం ఉన్న నిందితులను కఠినంగా శిక్షించాలని కోరుతున్నారు. తదుపరి పరీక్ష షెడ్యూల్ను తక్షణమే విడుదల చేయాలని డిమాండ్ చేస్తున్నారు.
ఇవీ చదవండి:
