కేరళ రాష్ట్రంలోని తిరువనంతపురంలో తెలంగాణకు చెందిన ఓ వ్యక్తి కరోనాతో మృతిచెందాడు. 68ఏళ్ల వృద్ధుడు అంజయ్య తన కుటుంబంతో కలిసి రాజస్థాన్లోని జైపూర్ నుంచి ప్రత్యేక రైలులో తెలంగాణకు బయలుదేరాడు. కానీ ఓ రైలుకు బదులు తప్పుగా వేరే రైలు ఎక్కడం వల్ల మే 22న కేరళలోని తిరువనంతపురానికి చేరారు. సరైన పత్రాలు లేని కారణంగా అక్కడి అధికారులు వారిని పూజప్పురలోని ది ఇనిస్టిట్యూట్ ఆఫ్ కోపరేటివ్ మేనేజ్మెంట్ కళాశాల ఆవరణలో ఏర్పాటు చేసిన క్వారంటైన్ కేంద్రానికి తరలించారు.
క్వారంటైన్లో ఉన్న అంజయ్యకు కరోనా లక్షణాలు కనబడడం వల్ల అతడిని ప్రభుత్వాసుపత్రికి తరలించారు. అక్కడ చికిత్స పొందుతూ బుధవారం తెల్లవారుజామున మృతిచెందినట్లు అధికారులు తెలిపారు. మరణానంతరం గురువారం అంజయ్య మృతదేహానికి వైద్య పరీక్షలు నిర్వహించగా అతడు కొవిడ్-19తో మృతిచెందినట్లు అధికారులు నిర్ధరించారు. అంజయ్య మృతితో ప్రస్తుతం ఆ రాష్ట్రంలో కరోనా మృతుల సంఖ్య ఏడుకు చేరింది. మృతదేహాన్ని తిరువనంతపురంలోని జనరల్ ఆస్పత్రి మార్చురీలో భద్రపరిచారు. కొవిడ్ నిబంధనల ప్రకారం అక్కడే అంత్యక్రియలు నిర్వహించనున్నారు. అంజయ్య భార్య, ఇద్దరి పిల్లలతో పాటు బంధువులు కూడా పూజప్పురలోని క్వారంటైన్ కేంద్రంలోనే ఉన్నారు.
ఇవీ చూడండి: ముఖ్యమంత్రి కేసీఆర్ పర్యటన సాగుతుందిలా..
