Manikrao thakre Meets T Congress Leaders : వరుస అపజయాలు, పార్టీలో అంతర్గత కుమ్ములాటలు, మరికొన్ని నెలల్లో శాసనసభ ఎన్నికల పోరు నేపథ్యంలో రాష్ట్ర కాంగ్రెస్‌లో సమస్యల పరిష్కారానికి ఆ పార్టీ అధిష్టానం చర్యలు చేపట్టింది. ఇందులో భాగంగానే మాణిక్కం ఠాగూర్‌ స్థానంలో మహారాష్ట్రకు చెందిన కాంగ్రెస్ సీనియర్‌ నేత మాణిక్రావు ఠాక్రేను రాష్ట్ర వ్యవహారాల బాధ్యుడిగా నియమించింది.
తొలిసారిగా రాష్ట్రానికి వచ్చిన మాణిక్రావు ఠాక్రేకు శంషాబాద్‌ విమానాశ్రయంలో రాష్ట్ర కాంగ్రెస్ నేతలు ఘనస్వాగతం పలికారు. పీసీసీ అధ్యక్షుడు రేవంత్‌రెడ్డి, సీఎల్పీ నేత భట్టి విక్రమార్క, పార్టీ నాయకులు వీహెచ్‌, అంజన్‌ కుమార్‌ యాదవ్‌తో పాటు పెద్దఎత్తున కార్యకర్తలు ఎయిర్‌పోర్టు వద్దకు చేరుకుని, ఠాక్రేను ఆహ్వానించారు. అనంతరం భారీ ర్యాలీగా గాంధీ భవన్కు వెళ్లారు.
వరుస భేటీలతో బిజీ: రెండ్రోజుల పాటు రాష్ట్రంలో పర్యటించనున్న మాణిక్రావ్ ఠాక్రే.. తొలిరోజు వరుస భేటీలతో బిజీగా గడుపుతున్నారు. విమానాశ్రయం నుంచి నేరుగా గాంధీభవన్‌కు వెళ్లిన ఆయన.. తొలుత ఏఐసీసీ కార్యదర్శులు బోసురాజు, రోహిత్ చౌదరీ, నదీం జావేద్‌తో సమావేశమయ్యారు. అనంతరం, పీసీసీ అధ్యక్షుడు రేవంత్‌రెడ్డితో భేటీ అయ్యారు. రాష్ట్రంలో తాజా రాజకీయాలు, పార్టీల పరిస్థితులపై ఆరా తీసిన ఆయన.. భవిష్యత్‌ కార్యాచరణపై చర్చించారు.
ఆ తర్వాత సీఎల్పీ నేత భట్టి విక్రమార్కతో ఠాక్రే.. సమావేశమై వివిధ అంశాలపై ఆరా తీశారు. మధ్యాహ్న భోజన విరామం అనంతరం పార్టీ కార్యనిర్వాహక అధ్యక్షుడు, సీనియర్‌ నేతలతో పాటు 3 గంటల తర్వాత రాజకీయ వ్యవహారాల కమిటీతో ఠాక్రే భేటీ అవుతారు. అనంతరం పీసీసీ ఎగ్జిక్యూటివ్‌ కమిటీ, ఆఫీస్‌ బేరర్లతో వేర్వేరుగా సమావేశం కానున్నారు. ఎంపీ కోమటిరెడ్డి వెంకట్రెడ్డి, ఎమ్మెల్యే జగ్గారెడ్డిలతో భేటీ అయ్యేందుకు వారిని ఠాక్రే గాంధీ భవన్కు పిలిచారు. రేపు పార్టీ జిల్లా అధ్యక్షుడు, అనుబంధ సంఘాలతో భేటీ కానున్న మాణిక్రావ్ ఠాక్రే.. సాయంత్రం దిల్లీకి బయలుదేరనున్నారు.
ఇన్‌ఛార్జ్ రాకతో ఆసక్తి : ఇటీవల పార్టీ సీనియర్‌ నేతల అసమ్మతి, ఇతర పరిణామాల నేపథ్యంలో నూతన ఇన్‌ఛార్జ్ రాకతో ఆసక్తి నెలకొంది. ఓ వైపు కోమటిరెడ్డి వెంకట్రెడ్డి దూరంగా ఉండటం, పీసీసీ కమిటీల చిచ్చు, ఈ నెల 26 నుంచి హాత్‌సే హాత్‌ జోడో యాత్రలపై నేతల వ్యాఖ్యానాలు ఆ పార్టీ శ్రేణులను సందిగ్ధంలో పడేస్తున్నాయి. ఈ క్రమంలోనే ఠాక్రే నియామకంతో నేతలందరూ ఏకతాటిపైకి వస్తారా..! అనే అంశాలు చర్చనీయాంశమయ్యాయి. రాబోయే ఎన్నికలు కాంగ్రెస్‌కు అత్యంత ప్రతిష్టాత్మకంగా మారిన వేళ.. తనకు సవాళ్లుగా ఉన్న అంతర్గత సమస్యలను పరిష్కరిస్తారా.. అనే అంశంపై ఆసక్తి నెలకొంది.
ఇవీ చదవండి :
