ఆంధ్రప్రదేశ్లోని కర్నూలు జిల్లా ప్యాపిలి వెంగలాంపల్లి ప్రభుత్వ ప్రాథమిక పాఠశాలలో విషాదం చోటు చేసుకుంది. పాఠశాలకు విద్యార్థులతో పాటే హాజరయ్యే కొండముచ్చు తనువు చాలించింది. రోజు విద్యార్థులతో బడికి హాజరవుతూ, ఉపాధ్యాయులు చెప్పే పాఠాలను ఆలకించే ఈ కొండముచ్చు... విద్యార్థులతో మమేకమైపోయింది. విద్యార్థులు చెప్పింది వింటూ, వారు చెప్పినట్లు నడుచుకునే ఈ కొండముచ్చుతో వారికి అనుబంధం ఏర్పడింది. ఉదయానే పాఠశాలకు వచ్చి, పాఠశాల సమయం ముగిశాక విద్యార్థులతో పాటే బయటకు వెళ్లిపోయే ఈ కొండముచ్చు, కుక్కల బారిన పడి తీవ్రంగా గాయపడి చనిపోయింది. విద్యార్థి వానరంగా జిల్లాలో సుపరిచయంగా ఉన్న ఈ కొండముచ్చును ప్రజలు ఆసక్తిగా చూసేవారు. ఇప్పుడు ఈ వానరం మృతి చెందడం వల్ల విద్యార్థులు, ఉపాధ్యాయులు కన్నీరు మున్నీరయ్యారు. ఘనంగా అంత్యక్రియలు నిర్వహించి, వానరంతో ఉన్న అనుబంధాన్ని గుర్తు చేసుకున్నారు. పాఠశాలలో తమతో గడిపిన ఈ కొండముచ్చు గుర్తుగా... పాఠశాలలో పోస్టర్ను ఏర్పాటు చేస్తామని ఉపాధ్యాయుడు లతీఫ్ తెలిపారు.
ఇదీ చూడండి:అద్భుతం...అపురూపం..మనసు పులకింత
