అవినీతిపరులను వదలం - తెలంగాణలో బీసీని ముఖ్యమంత్రిని చేస్తాం : మోదీ గ్యారెంటీ

PM Modi at BC Atma Gourava Sabha in Hyderabad : బీఆర్ఎస్ సర్కారు అవినీతి దిల్లీ వరకు పాకిందని.. ప్రధాని నరేంద్రమోదీ విమర్శించారు. అవినీతి చేసిన వారిని విడచిపెట్టబోమన్న ఆయన.. తిన్నదంతా తిరిగి వసూలు చేస్తామని.. అది మోదీ గ్యారెంటీ అని హెచ్చరించారు. ఎల్బీ స్టేడియంలో బీజేపీ నిర్వహించిన బీసీ ఆత్మగౌరవ సభకు ముఖ్య అతిథిగా హాజరైన ప్రధాని.. కాంగ్రెస్, బీఆర్ఎస్ డీఎన్ఏ ఒక్కటేనని విమర్శించారు. ప్రజలు, బీసీలను మోసంచేసిన ప్రభుత్వాన్ని ఇంటికి సాగనంపాలని ప్రజలకు పిలుపునిచ్చారు.

PM Modi at BC Atma Gourava Sabha in Hyderabad : అసెంబ్లీ ఎన్నికల్లో భాగంగా ఎల్బీ స్టేడియం వేదికగా.. బీజేపీ బీసీ ఆత్మగౌరవ సభ ఏర్పాటు చేసింది. బేగంపేట విమానాశ్రయం నుంచి ఎల్బీ స్టేడియానికి చేరుకున్న ప్రధాని నరేంద్రమోదీకి పార్టీ శ్రేణులు ఘన స్వాగతం పలికాయి. ఓపెన్‌టాప్‌ జీప్‌లో ప్రజల మధ్య నుంచి వెళ్లిన మోదీపై.. పార్టీ శ్రేణులు పుష్పవర్షం కురిపించారు. సమ్మక్క సారలమ్మ ఆశీర్వదాంతో ప్రసంగం మొదలు పెడుతున్నట్లు చెప్పిన మోదీ.. పదేళ్ల క్రితం గుజరాత్‌ ముఖ్యమంత్రిగా ఇదే స్టేడియానికి వచ్చానని.. ఎల్బీ స్టేడియంలో జరిగిన సభ దేశ చరిత్రలో మార్పునకు నాందిగా నిలిచిందని పేర్కొన్నారు. ఆ సభ తర్వాతే భారతప్రధాని అయ్యానని గుర్తుచేశారు.

PM Modi Speech at BC Atma Gourava Sabha : ప్రస్తుతం బీసీ ముఖ్యమంత్రి అయ్యేందుకు ఎల్బీ స్టేడియం కీలకంగా మారాలని మోదీ కోరారు. పదేళ్ల బీఆర్ఎస్ పాలనలో అవినీతి పెరిగిందన్న మోదీ.. తిన్న అవినీతి సొమ్ము అంతా తిరిగి వసూలు చేస్తామని స్పష్టం చేశారు. కాంగ్రెస్, బీఆర్ఎస్​లపై విమర్శనాస్త్రాలు సంధించారు. వారికి ప్రజాసంక్షేమం కంటే స్వలాభమే ముఖ్యమని.. ప్రధాని మోదీ విమర్శించారు.

'కాంగ్రెస్‌ పార్టీ 7 దశాబ్దాలుగా వారసత్వం, అవినీతి మోడల్‌ను అభివృద్ధి చేసింది. బీఆర్ఎస్ అదే దిశలో నడుస్తోంది. రాష్ట్రసంపదను దోచుకోవాలన్నదే ఆ పార్టీల లక్ష్యం. ఈ పార్టీలకు వారసులకు దోచిపెట్టడమే పని. కానీ మీ పిల్లల భవిష్యత్‌ వారికి ఏ మాత్రం పట్టదు. బీఆర్ఎస్ అవినీతి తీగ దిల్లీలోని మద్యం కుంభకోణంతోనూ కలిసి ఉంది. వారి అవినీతిపై విచారణ ప్రారంభిస్తే.. దర్యాప్తు సంస్థలను దూషిస్తున్నారు. అవినీతికి వ్యతిరేకంగా విచారణ జరుగుతూనే ఉంటుందని ఢంకా భజాయించి చెబుతున్నా. ప్రజాధనం దోపిడీ చేసిన సొమ్మును తిరిగి వసూలు చేస్తాం. తెలంగాణ సోదరీ సోదరీమణులకు ఇదీ మోదీ గ్యారెంటీ.' - నరేంద్రమోదీ, ప్రధానమంత్రి

Modi Fires on Congress and BRS : నీళ్లు, నిధులు, నియామకాలే లక్ష్యంగా ఏర్పాటైన తెలంగాణలో.. ఆ ఆకాంక్షలు నెరవేరలేదని మోదీ ఆరోపించారు. ప్రత్యేక రాష్ట్రం కోసం బీసీలు ఎంతో కష్టపడ్డారని.. రాష్ట్ర ఏర్పాటు తర్వాత ప్రభుత్వం వారిని మోసం చేసిందన్నారు. ఓబీసీ, ఎస్సీ, ఎస్టీల సంక్షేమాన్ని.. బీఆర్ఎస్ సర్కార్ పట్టించుకోలేదని మోదీ విమర్శించారు. అధికార పార్టీ నాయకులకు అహంకారం తలకెక్కిందని మోదీ ధ్వజమెత్తారు.