'పీవీ బాటలో నడుస్తాం... 2023లో ప్రభుత్వాన్ని ఏర్పాటు చేద్దాం'

రాష్ట్రానికి, దేశానికి పీవీ చేసిన సేవలు మరువలేనివని కాంగ్రెస్‌ పార్టీ కొనియాడింది. తెలంగాణ పీసీసీ ఆధ్వర్యంలో గాంధీ భవనలో పీవీ శతజయంతి ఉత్సవాలు నిర్వహించారు. పీవీ చిత్రపటానికి నేతలు పూలమాలలు వేసి పీవీ దేశానికి, పార్టీకి చేసిన సేవలను గుర్తు చేసుకున్నారు.

గాంధీ భవన్​లో పీవీ నరసింహారావు శతజయంతి ఉత్సవాలు ప్రారంభమయ్యాయి. పీవీ సోదరుడు పీవీ మనోహర రావు, పీసీసీ అధ్యక్షుడు ఉత్తమ్ కుమార్ రెడ్డి, ఉత్సవాల కమీటీ చైర్మన్ గీతా రెడ్డి, మాజీ పీసీసీ అధ్యక్షుడు హనుమంతరావు తదితరుల జ్యోతిప్రజ్వలనతో వేడుకలు మొదలయ్యాయి. పీవీ నరసింహారావు చిత్ర పటం వద్ద పీవీ సోదరుడు మనోహరరావుతో పాటు పలువురు కాంగ్రెస్ నాయకులు పుష్ప గుచ్చాలు ఉంచి నివాళులు అర్పించారు.

అనంతరం స్వర్గీయ పీవీ నరసింహారావు రాష్ట్రానికి, దేశానికి చేసిన సేవలను గుర్తు చేస్తూ డాక్యుమెంటరీ ప్రదర్శించారు. వర్చువల్ మీటింగ్​ లో మాజీ రాష్ట్రపతి ప్రణబ్ ముఖర్జీ, మాజీ ప్రధానమంత్రి మన్మోహన్ సింగ్, మాజీ కేంద్ర మంత్రులు చిదంబరం, జైరాం రమేష్, రాష్ట్ర వ్యవహారాల ఇన్చార్జి కుంతియాలు తమ సందేశాన్ని అందించారు. ఎన్నటికీ పీవీ ప్రజల గుండెల్లో నిలిచిపోతారని ఉత్తమ్‌ కుమార్‌ రెడ్డి పేర్కొన్నారు. పీవీ బాటలో నడుస్తూ.. 2023లో తెలంగాణలో ప్రభుత్వాన్ని ఏర్పాటు చేస్తామని ధీమా వ్యక్తం చేశారు.

''పీవీ నరసింహారావు వ్యక్తిగతంగా నాకు బాగా పరిచయం. నేను అభిమానించే వ్యక్తి. ఆయన జ్ఞాపకాలు ఎల్లప్పుడూ నాతోనే ఉంటాయి. ఉమ్మడి ఆంధ్రప్రదేశ్​లో భూసంస్కరణలు తీసుకొచ్చి... లక్షలాది మందికి భూమి ఇచ్చిన ఘనత ఆయనదే. ఆయన రాష్ట్రానికి, దేశానికి చేసిన సేవలు ఎన్నటికీ ప్రజల గుండెల్లో నిలిచిపోతాయి. ఆయన పుట్టినప్పటి నుంచి చనిపోయేవరకు కాంగ్రెస్ వాదీగానే కొనసాగరనే విషయం అందరూ గుర్తుంచుకోవాలి. ఆయన మార్గంలోనే నడుస్తూ... 2023లో తెలంగాణలో కాంగ్రెస్ పార్టీ గెలిపించి... ప్రభుత్వాన్ని ఏర్పాటు చేసే విధంగా అందరూ కృషి చేయాలి.''

-పీసీసీ అధ్యక్షుడు ఉత్తమ్ కుమార్ రెడ్డి

ఇదీ చూడండి: గాంధీభవన్​లో పీవీ శతజయంతి ఉత్సవాలు ప్రారంభం