గాంధీ ఆస్పత్రిలో ఒక పేషెంట్పై ప్రపంచ ఆరోగ్య సంస్థతో కలిసి కొత్త యాంటీ వైరల్ డ్రగ్స్ ప్రయోగిస్తున్నామని గాంధీ సూపరింటెండెంట్ రాజారావు హైకోర్టుకు తెలిపారు. సానుకూల ఫలితాలు వస్తున్నాయని చెప్పారు. ఐసీఎంఆర్ తాజా మార్గదర్శకాలు ఇటీవలే వచ్చాయని, వాటి ప్రకారం ర్యాపిడ్ యాంటీజెంట్ పరీక్షలు చేసేందుకు ఆలోచిస్తున్నట్లు ఆయన పేర్కొన్నారు. లక్షణాలు లేని వారికి కరోనా పరీక్షలు అవసరం లేదని అన్నారు. వారి నుంచి ఇతరులకు వ్యాప్తి చెందే అవకాశం కూడా చాలా తక్కువని ఆయన వివరించారు.
ఆస్పత్రిలోనే వసతి
గాంధీ ఆస్పత్రిలో 12 మంది వైద్యులు కరోనా బారిన పడ్డారని వివరించారు. వైద్య సిబ్బందికి అన్ని జాగ్రత్తలు తీసుకుంటున్నామని పేర్కొన్నారు. సూపరిండెంట్ నుంచి వార్డుబాయ్ వరకు ఒకే నాణ్యతతో కూడిన కిట్లు ఇస్తున్నట్లు తెలిపారు. ఇంట్లో వృద్ధులు ఉన్న వైద్య సిబ్బందికి ఆస్పత్రిలోనే వసతి కల్పించినట్లు వివరించారు. సుమారు 1200 వైద్య సిబ్బందిలో సగం మందిని మూడు షిఫ్టుల్లో పని చేసేలా ఏర్పాట్లు చేశామన్నారు.
79 మంది వైద్యులకు కరోనా
1500 పడకలు ఉన్న గాంధీ ఆస్పత్రిలో ప్రస్తుతం 441 మంది కరోనాతో చికిత్స పొందుతున్నారని.. వారిలో 168 మంది ఐసీయూలో, 98 మంది ఆక్సిజన్తో, 11 మంది వెంటిలేటర్లపై ఉన్నారని వివరించారు. గాంధీ ఆస్పత్రికి 59 వేల 835 కిట్లు రాగా, 57 వేల 91 మంది సిబ్బందికి సరఫరా చేశామని అన్నారు. ప్రైవేట్ ఆస్పత్రిలోని 12 మంది సహా రాష్ట్ర వ్యాప్తంగా 79 మంది వైద్యులకు కరోనా సోకినట్లు హైకోర్టుకు రాష్ట్ర పబ్లిక్ హెల్త్ డైరెక్టర్ శ్రీనివాసరావు తెలిపారు. వారికి కరోనా సోకింది ఆస్పత్రుల్లో కాదని పేర్కొన్నారు.
ఇదీ చూడండి : శుక్రవారం రాహుల్‌ గాంధీ జన్మదినం.. కార్యకర్తలకు ప్రత్యేక సూచనలు
