Yasangi rythu bandhu: రైతు సంక్షేమాన్ని దృష్టిలో పెట్టుకొని... ముఖ్యమంత్రి కేసీఆర్ 2018 మేలో ప్రారంభించిన రైతుబంధు పథకం కింద ఇప్పటి వరకు ఏడు పంటలకు పెట్టుబడి సాయం అందింది. మొదట్లో ఎకరాకు ఏడాదికి రూ. 8 వేలు పెట్టుబడి సాయంగా అందించగా... రెండేళ్ల అనంతరం దాన్ని ఎకరాకు రూ. 10 వేలకు పెంచారు. రైతుబంధు కింద 2018-19లో రెండు పంటలకు గాను రూ. 10,488కోట్లు చెల్లింపులు చేశారు. 2019-20లో వానాకాలం, యాసంగి పంటలకు రూ. 10, 532 కోట్లు రైతుల ఖాతాల్లో జమ చేశారు. ఎకరాకు ఏడాదికి 10 వేల రూపాయలు పెంచాక 2020-21లో రెండు పంటల సీజన్లకు కలిపి 14 వేల 656 కోట్లు రైతుల బ్యాంకు ఖాతాల్లో ప్రభుత్వం జమ చేసింది.
7 విడతల్లో రూ. 43,054 కోట్లకుపైగా సాయం ...
Rythu bandhu Scheme: ఈ ఏడాది వానాకాలం పంటకు సంబంధించి గరిష్ఠంగా 61,08,000 మందికి పైగా రైతులకు పెట్టుబడి సాయం అందింది. 1.32 కోట్లకు పైగా ఎకరాల భూమికి పెట్టుబడి సాయంగా రూ 7, 377 కోట్ల రైతులకు ఇచ్చారు. ఇప్పటి వరకు రాష్ట్ర ప్రభుత్వం మొత్తం 7 విడతల్లో రూ. 43,054 కోట్లకు పైగా రైతుబంధు సాయంగా అందించింది.
50వేల కోట్ల మార్కు దాటనున్న సాయం. ..
యాసంగి పంటకు సంబంధించి అందరికీ రైతుబంధు అందిస్తామని ముఖ్యమంత్రి కేసీఆర్ ఇప్పటికే ప్రకటించారు. అందుకు అనుగుణంగా అధికారులు సన్నద్ధమవుతున్నారు. గతంలో మాదిరిగానే విస్తీర్ణం ఆధారంగా.... ఈ నెల చివరి వారంలో రైతుబంధు సాయాన్ని అందించనున్నారు. వానాకాలం పంటకు రూ 7, 377 కోట్ల సాయం ఇచ్చిన నేపథ్యంలో ఈ మారు అంతే అవసరం కానుంది. నిధులపై దృష్టిసారించిన ఆర్థికశాఖ.... అవసరమైతే రుణాలు తీసుకుని సిద్ధం చేసుకునేందుకు ప్రయత్నిస్తోంది. యాసంగి చెల్లింపులతో రైతుబంధు సాయం రూ. 50వేల కోట్ల మార్కును దాటనుంది.
ఇదీ చదవండి: Dharmapuri Arvind: తెరాస ఎమ్మెల్యేలు బియ్యం రీసైక్లింగ్ దందాలో ఉన్నారు: ఎంపీ అర్వింద్‌
