హైదరాబాద్‌లోని పలు పబ్బులు అర్ధరాత్రి దాటే వరకు నడుస్తున్నా.. కొన్నింటిలో మాదక ద్రవ్యాలు సరఫరా అవుతున్నా అధికార యంత్రాంగం పెద్దగా పట్టించుకోవడం లేదు. మద్యం, మాదక ద్రవ్యాల మత్తులో కొందరు యువతీయువకులు వీరంగాలు సృష్టిస్తున్నారు. బిగ్‌బాస్‌-3 విజేత రాహుల్‌ సిప్లీగంజ్‌పై జరిగిన దాడి తాజా నిదర్శనం. పబ్బుల్లోకి ప్రవేశించాక ఆ వాతావరణానికి 90 శాతంమంది విచక్షణ కోల్పోయి ప్రవరిస్తున్నారు. యువతులు, మహిళలపై అసభ్యంగా ప్రవరిస్తున్నారు. ప్రశ్నిస్తే దాడి చేసేందుకూ వెనుకాడటం లేదు. కొందరు రాజకీయ నాయకుల కుమారులు పబ్బుల్లోనే సెటిల్‌మెంట్లు చేస్తున్నారు. రెండు, మూడు నెలల వ్యవధిలో మాదాపూర్‌, గచ్చిబౌలి, జూబ్లీహిల్స్‌లోని కొన్ని పబ్బుల్లో అవాంఛనీయ ఘటనలు చోటు చేసుకున్నాయి.
- పటాన్‌చెరుకు చెందిన ఒక రాజకీయ నాయకుడి కుమారుడు ఓ యువ కథానాయికను వేధించి అసభ్యంగా ప్రవర్తించడంతో ఆమె పోలీసులకు ఫిర్యాదు చేసింది.
- మాదాపూర్‌లోని ఓ పబ్‌కు వెళ్లిన యువ ఐపీఎస్‌ అధికారి బిల్లు విషయంలో నిర్వాహకులతో గొడవపడి సిబ్బందిపై దాడి చేసేందుకు యత్నించాడు.
- జూబ్లీహిల్స్‌లోని ఓ పబ్‌లో బిల్లు ఎక్కువ వేశారని వినియోగదారుడు ప్రశ్నిస్తే.. బౌన్సర్లతో దాడి చేయించారు.
రాయితీలంటూ వల..
పుట్టినరోజు, వీడ్కోలు, ఫ్రెషర్స్‌ డే.. వేడుక ఏదైనా తమ పబ్బుల్లో చేసుకుంటే రాయితీలు ఇస్తామంటూ నిర్వాహకులు ఊరిస్తున్నారు. రాత్రి వేళల్లో ప్రత్యేకంగా సమావేశ గదులు ఏర్పాటు చేస్తామని ఆశ చూపుతున్నారు. మద్యం, భోజనం బిల్లు రూ. 25,000 దాటితే 15 శాతం, రూ.50,000 దాటితే 20 శాతం రాయితీ ఇస్తామంటూ వివరిస్తున్నారు. కేక్‌ల వంటివి ఉచితంగా ఇస్తామంటున్నారు. దీనితో కొందరు విద్యార్థులు నెలలో కనీసం రెండుసార్లయినా పబ్బులకు వెళ్తున్నారు. బషీర్‌బాగ్‌లోని ఓ విద్యాసంస్థకు చెందిన ఇంటర్‌ విద్యార్థినుల్లో కొందరు వీడ్కోలు వేడుకల కోసం బంజారాహిల్స్‌లోని ఓ పబ్బుకు వెళ్లారు. వారు మైనర్లని తెలిసినా నిర్వాహకులు మద్యం సరఫరా చేశారు.
నిబంధనలు బేఖాతర్‌..
నగరంలోని పబ్బుల్లో ఎక్కువశాతం బంజారాహిల్స్‌, జూబ్లీహిల్స్‌, మాదాపూర్‌, గచ్చిబౌలి, రాయదుర్గం పోలీసు, ఎక్సైజ్‌ ఠాణాల పరిధుల్లోనే ఉన్నాయి. ఎక్సైజ్‌ శాఖ నిబంధనల ప్రకారం వీటిని రాత్రి 11 గంటలకు బంద్‌ చేయాలి. మైనర్లకు మద్యం సరఫరా చేయకూడదు. ప్రతి పబ్బులోనూ ప్రవేశ, నిష్క్రమణ ద్వారాల వద్ద సీసీ కెమెరాలుండాలి.
- మాదాపూర్‌, గచ్చిబౌలి, బంజారాహిల్స్‌ రోడ్డు నంబరు 12లోని కొన్ని పబ్బుల్లో అర్ధరాత్రి దాటినా మద్యం విక్రయిస్తున్నారు.
- గచ్చిబౌలిలోని ఒక పబ్ అర్ధరాత్రి 2 గంటలు దాటాకే మూతపడుతోంది.
- జూబ్లీహిల్స్‌లో ఒక పబ్ రాత్రి పగలు తెరిచే ఉంటుంది. కొందరు ఖరీదైన వినియోగదారులైతే అర్ధరాత్రి మాత్రమే వస్తారు. ఉదయం నాలుగు గంటల వరకూ నృత్యాలు చేసి మరీ వెళ్తున్నారు.
- బంజారాహిల్స్‌, జూబ్లీహిల్స్‌లోని మూడు పబ్బుల్లో అర్ధరాత్రి దాటినా రణగొణధ్వనులు కొనసాగిస్తుంటే స్థానికులు పోలీసులకు, జీహెచ్‌ఎంసీ అధికారులకు ఫిర్యాదు చేశారు. ఒకటి, రెండు రోజుల తర్వాత మళ్లీ మామూలే.
- ఎక్సైజ్‌శాఖ నిబంధనల మేరకు మైనర్‌ అంటే 21 సంవత్సరాలు నిండి ఉండాలి. ఇందుకు విరుద్ధంగా 20 ఏళ్లలోపు యువతీయువకులు పబ్బులకు వస్తున్నారు. ఇంటర్‌ విద్యార్థులు కూడా వచ్చి మద్యం తాగి వెళ్తున్నారు.
ఇవీ చూడండి: రాహుల్‌ సిప్లిగంజ్‌పై దాడి.. తీవ్ర రక్తస్రావం
