విశాఖ గ్యాస్ లీకేజీ ఘటన దురదృష్టకరమని సీపీఐ జాతీయ కార్యదర్శి నారాయణ ఆందోళన వ్యక్తం చేశారు. ఆ కంపెనీని వెంటనే రద్దు చేసి యాజమాన్యంపై క్రిమినల్ కేసులు పెట్టాలని పేర్కొన్నారు. లీకైన వాయువు భోపాల్‌ గ్యాస్ తరహా విషవాయువుగా పేర్కొన్నారు. కాలుష్య నియంత్రణ మండలి అధికారులను సైతం సస్పెండ్ చేయాలని నారాయణ డిమాండ్ చేశారు. ఏపీ ప్రభుత్వం చనిపోయిన వారికి 25లక్షలు.. క్షత్రగాత్రులకు 15వేల నష్టపరిహారం ఇవ్వాలన్నారు.
మరోవైపు దేశంలో పెట్రోల్‌ ధరలు పెంచి ప్రజలపై భారం మోపుతున్నారని కేంద్రంపై ధ్వజమెత్తారు. ప్రస్తుత పరిస్థితుల్లో రేషన్ కార్డులు లేకున్నా ప్రతి వ్యక్తికి రూ.10వేల నగదు, 20కిలోల బియ్యం ఇవ్వాలని నారాయణ డిమాండ్ చేశారు. కరోనా వైరస్ విజృంభిస్తోన్న తరుణంలో భౌతిక దూరం పాటించాలన్న మోదీ ప్రభుత్వం... మద్యం దుకాణాలు తెరిచి నిబంధనలను తానే తుంగలో తొక్కారని అగ్రహం వ్యక్తం చేశారు.
సంక్షేమ సొమ్మంతా మద్యం తాగేందుకేనా ? : చాడ
మద్యపానం వల్ల అరాచకం పెరిగిపోయిందని... ప్రభుత్వం ఇచ్చే సంక్షేమ డబ్బులన్నీ మద్యం కోసం ఖర్చు చేస్తున్నారని హైదరాబాద్‌లో సీపీఐ రాష్ట్ర కార్యదర్శి చాడ వెంకట్‌రెడ్డి కేంద్ర రాష్ట్ర ప్రభుత్వాలను విమర్శించారు. మద్యం కోసం తెరాస, వైసీపీ కార్యకర్తలే 'క్యూ' లైన్‌ల్లో ఉన్నారని పేర్కొన్నారు.
మాకు గౌరవం ఇవ్వకుంటే...మేమూ ఇవ్వమూ...
ప్రతిపక్షాలు అంటే ప్రజల గొంతును వినిపించే వాణి అని ఆయన స్పష్టం చేశారు. సీఎం కేసీఆర్ అహంకారపూరితమైన వైఖరిని సీపీఐ తీవ్రంగా ఖండిస్తోందని వెల్లడించారు. కరోనా పరీక్షలు తక్కువగా చేస్తున్నారని చెప్పడం తప్పేలా అవుతుందని సీఎంను ప్రశ్నించారు. తమను కేసీఆర్ గౌరవిస్తే తాము గౌరవిస్తామని.. తిరస్కరిస్తే తాము కూడా నిరభ్యంతరంగా తిరస్కరిస్తామని స్పష్టం చేశారు.
