'మద్యం ధరలు పెంచడం కాదు... షాపుల సంఖ్య తగ్గించండి'

ముఖ్యమంత్రి కేసీఆర్​ తీరుపై కాంగ్రెస్​ ఎమ్మెల్సీ జీవన్​రెడ్డి మండిపడ్డారు. మద్యం అమ్మకాలను ఆదాయ వనరుగా మార్చుకోవడం దురదృష్టకరమని వెల్లడించారు. రాష్ట్రంలో నేరాలు పెరగడానికి, మహిళలపై అఘాయిత్యాలు అధికం కావడానికి విచ్చలవిడిగా జరుగుతున్న మద్యం అమ్మకాలేనని ఆరోపించారు.

ముఖ్యమంత్రి కేసీఆర్​ ఆబ్కారీ శాఖ పేరును... మద్యం ప్రోత్సాహక శాఖగా పేరు మారిస్తే బాగుంటుందని కాంగ్రెస్​ ఎమ్మెల్సీ జీవన్​రెడ్డి ఎద్దేవా చేశారు. ఆంధ్రప్రదేశ్​లో మద్యం ధరలు పెంచారని... తెలంగాణలో కూడా ధరలు పెంచడం ఏమిటని ప్రశ్నించిన ఆయన... ఏపీలో మద్యం దుకాణాల సంఖ్య తగ్గించారని ఇక్కడ ఆ పని ఎందుకు చేయడం లేదని నిలదీశారు. రాష్ట్రంలో నేరాలు పెరగడానికి, మహిళలపై అఘాయిత్యాలు అధికం కావడానికి విచ్చలవిడిగా జరుగుతున్న మద్యం అమ్మకాలేనని ఆరోపించారు.

రాష్ట్రంపై ఆర్థిక మాంద్యం ప్రభావం పడిందని చెబుతున్న ముఖ్యమంత్రి కేసీఆర్​ మద్యం అమ్మకాలు విస్తరించడం ద్వారా రాబడిని పెంచుకోవడం విడ్డూరంగా ఉందని మండిపడ్డారు. మద్యం ద్వారా రాష్ట్రానికి 25వేల కోట్ల రూపాయల రాబడి వస్తోందని, మద్యం అమ్మకాలను ఆదాయ వనరుగా మార్చుకోవడం దురదృష్టకరమన్నారు.

మద్యంతో ప్రజలపై పడే భారం.. రాష్ట్ర బడ్జెట్​లో సగంగా కేసీఆర్​ భావిస్తున్నారా అని నిలదీశారు. ప్రభుత్వ విధానాలు మద్యపానం ప్రోత్సహకంగా ఉన్నాయని... ప్రభుత్వానికి చిత్తశుద్ధి ఉంటే... బెల్ట్​ షాపులని తక్షణమే రద్దు చేయాలని డిమాండ్​ చేశారు.

• ఇవీ చూడండి: యాదాద్రిలో కేసీఆర్​... ఆలయ పనుల పురోగతిపై ఆరా...