BRS Campaign in Telangana 2023 : ప్రచారం జోరు పెంచిన గులాబీ దళపతి.. ప్రజా ఆశీర్వాద సభ(Praja Aahrvada Sabha)లకు ఇవాళ విరామం ఇచ్చారు. ఇప్పటి వరకు పదమూడు నియోజకవర్గాల్లోని సభల్లో కేసీఆర్ పాల్గొన్నారు. ఆదివారం నుంచి మళ్లీ నవంబరు 9 వరకు రోజూ పర్యటించనున్నారు. ఆదివారం కోదాడ, తుంగతుర్తి, ఆలేరులో సభలు జరగనున్నాయి. నియోజకవర్గంలో రాజకీయ పరిస్థితులకు అనుగుణంగా ఆయన ప్రసంగిస్తున్నారు. ఉద్యమ ప్రస్థానాన్ని ప్రతీ నియోజకవర్గంలో ప్రస్తావిస్తూ.. రాష్ట్రావిర్భావంలో తన నాయకత్వాన్ని గుర్తు చేస్తున్నారు.
CM KCR Election Campaign in Telangana : తొమ్మిదిన్నరేళ్లలో రైతుబంధు, ఆసరా ఫించన్ల వంటి బీఆర్ఎస్ ప్రభుత్వం చేసిన అభివృద్ధి, సంక్షేమ కార్యక్రమాలను ప్రజలకు వివరిస్తున్నారు. ఎక్కడికెళ్లినా ఆ ప్రాంతానికి సంబంధించిన సాగునీటి ప్రాజెక్టులు వాటి ఫలాలను చెబుతూ.. భూముల విలువ ఎలా పెరిగిందోనని కేసీఆర్ విశదీకరిస్తున్నారు. కేసీఆర్ భరోసా పేరిట ఎన్నికల మెనిఫెస్టోను ప్రచారాన్ని బీఆర్ఎస్(BRS) విస్తృతం చేస్తోంది. దానికి అనుగుణంగా కేసీఆర్ కూడా తన ప్రసంగాల్లో మహిళలకు భృతి, నాలుగు వందల రూపాయలకే సిలిండర్, రైతుబంధు, ఫించన్ల పెంపు వంటివి ప్రజలకు వివరిస్తున్నారు.
BRS Leaders Comments on Congress : ఒకవైపు చేసింది చెబుతూ.. మేనిఫెస్టోను వివరిస్తూనే.. ప్రత్యర్థులపై ముఖ్యంగా కాంగ్రెస్పై ప్రతీ సభలోనూ విరుచుకుపడుతున్నారు. ఎక్కువగా కాంగ్రెస్ పార్టీ అధికారంలో ఉన్నప్పటి పరిస్థితులు, విధానాలను విమర్శిస్తున్న గులాబీ దళపతి(KCR).. అప్పుడప్పడు ముఖ్యనేతలపైనా ఆరోపణలు ఎక్కు పెడుతున్నారు. అచ్చంపేటలో రేవంత్ రెడ్డిపై, పాలేరు సభలో తుమ్మల నాగేశ్వరరావు, పొంగులేటి శ్రీనివాస్ రెడ్డిపై విరుచుపడ్డారు. కీలక నేతలు లేని ఇతర నియోజకవర్గాల్లో మాత్రం పార్టీలపైనే ఎక్కువగా దృష్టి పెడుతున్నారు.
"ధరణిని ఎవరైతే తీసి బంగాళఖాతంలో వేస్తామన్నారో.. వాళ్లనే ప్రజలు బంగాళఖాతంలో కలుపుతారు. బీఆర్ఎస్ ప్రభుత్వం వస్తే ప్రగతి కొనసాగుతోంది. ప్రజలు జాగ్రత్తగా ఆలోచించి ఓటు వేయాలి.- కేసీఆర్, తెలంగాణ ముఖ్యమంత్రి
Harish Rao Election Campaign in Telangana : కేసీఆర్తో పాటు.. కేటీఆర్, హరీశ్రావు కూడా ప్రత్యర్థి పార్టీలపై విమర్శనాస్త్రాలు సంధిస్తున్నారు. కాంగ్రెస్‌ను పొరపాటున నమ్మితే.. తెలంగాణ మళ్లీ ఆగం అవుతుందంటూ ప్రసంగాల్లో బీఆర్ఎస్ ముఖ్య నేతలు ఆరోపిస్తున్నారు. గ్యారెంటీల పేరుతో కర్ణాటకలో గెలిచి.. ఆరు నెలల్లోనే మోసం చేశారంటూ.. ఆ రాష్ట్ర పరిస్థితులను ప్రచారం చేస్తున్నారు. సందర్భం వచ్చినప్పుడల్లా ఆంధ్రప్రదేశ్లోని పరిస్థితులతో పోలుస్తూ చెబుతున్నారు. కేసీఆర్ మళ్లీ గెలవకపోతే.. తెలంగాణలో అమరావతి పరిస్థితులు తలెత్తి భూముల ధరలు పడిపోతాయన్న ఆందోళన నెలకొందని హరీశ్రావు వ్యాఖ్యానించారు.
CM KCR Next Public Meetings : ఇప్పటి వరకు హుస్నాబాద్, జనగామ, భువనగిరి, సిరిసిల్ల, సిద్ధిపేట, జడ్చర్ల, మేడ్చల్, అచ్చంపేట, వనపర్తి, మునుగోడు, పాలేరు, మహబూబాబాద్, వర్దన్నపేటలో సభలు పూర్తి చేసిన కేసీఆర్.. ఆదివారం కోదాడ, తుంగతుర్తి, ఆలేరు.. సోమవారం జుక్కల్, బాన్సువాడ, నారాయణఖేడ్లో పర్యటించనున్నారు. నవంబరు 9 వరకు రోజూ నియోజకవర్గాల బాటపట్టనున్నారు. బీఆర్ఎస్ కార్యనిర్వాహక అధ్యక్షుడు కేటీఆర్(KTR) నేడు పార్టీ ఎన్ఆర్ఐ విభాగాలతో వీడియో కాన్ఫరెన్స్ నిర్వహించారు. ప్రపంచవ్యాప్తంగా 52 దేశాల్లోని బీఆర్ఎస్ ఎన్ఆర్ఐ విభాగాల నాయకులతో మాట్లాడి.. ఎన్నికల్లో ఏ విధంగా భాగస్వామ్యం కావాలో వివరించనున్నారు.
