'వరద ప్రభావిత ప్రాంతాల ప్రజలను ప్రభుత్వం ఆదుకోవాలి'

లంగర్​హౌజ్​ వరద ప్రభావిత ప్రాంతాలను భాజపా నేతలు పరిశీలించారు. బాధితులతో మాట్లాడి వారికి ధైర్యం చెప్పారు. వరదలతో ప్రజలు ఇబ్బందులు పడుతున్నారని.. ప్రభుత్వం వారిని ఆదుకోవాలని డిమాండ్​ చేశారు.

హైదరాబాద్​ లంగర్​హౌస్ ముంపు ప్రభావిత ప్రాంతాలను భాజపా నేతలు సందర్శించారు. బాధితులతో మాట్లాడి పలు సమస్యల వివరాలు తెలుసుకున్నారు. ఈ సందర్భంగా ప్రశాంత్ నగర్ వద్ద ఉన్న బ్రిడ్జిపై నుంచి వరద నీరు ప్రవహిస్తుండటం వల్ల జీహెచ్​ఎంసీ అధికారులతో మాట్లాడి బ్రిడ్జికి ఇరు వైపులా బార్ గేట్స్ ఏర్పాటు చేయించారు.

ప్రశాంత్​ నగర్​ వద్ద ఉన్న చిన్న బ్రిడ్జి కారణంగా చుట్టుపక్కల ఉన్న లోతట్టు ప్రాంతాలన్నీ జలమయంగా మారుతున్నాయని నేతలు ఆరోపించారు. గత వారం రోజులుగా ప్రజలు తీవ్ర ఇబ్బందులు పడుతున్నారని ఆవేదన వ్యక్తం చేశారు. ఈ సందర్భంగా వర్షాలు తగ్గుముఖం పట్టిన వెంటనే ప్రశాంత్​ నగర్​ వద్ద పెద్ద బ్రిడ్జి కట్టాలని డిమాండ్​ చేశారు.

కార్యక్రమంలో భాజపా రాష్ట్ర కార్యదర్శి ఉమారాణి, కార్వాన్ కన్వీనర్ గోవర్ధన్, సిటీ సెక్రటరీ వినేష్ సింగ్, ఇంద్రసేనారెడ్డి, పూర్ణచంద్రరావు, అర్పన్, డివిజన్ అధ్యక్షులు నాగేంద్ర ప్రకాష్ రెడ్డి, శివ కరణ్ సింగ్, సుధీర్ యాదవ్, సంతోష్, వివిధ మోర్చా నాయకులు పాల్గొన్నారు.