Bathukamma Celebrations in Uganda: ఉగాండా రాజధాని కంపాలాలో తెలంగాణ అసోసియేషన్ ఆఫ్ ఉగాండా ఆధ్వర్యంలో బతుకమ్మ వేడుకలను వైభవంగా నిర్వహించారు. తిరుమల తిరుపతి దేవస్థానం ఉగాండా ప్రాంగణంలో బతుకమ్మ సంబురాలను ఘనంగా జరుపుకున్నారు. ఈ వేడుకల్లో ప్రాంతాలకు అతీతంగా తెలుగువారు పెద్ద సంఖ్యలో హాజరయ్యారు. తీరొక్క పూలతో మహిళలు బతుకమ్మలను అందంగా పేర్చారు. పెద్ద సంఖ్యలో హాజరై ఆడిపాడి సందడి చేశారు.
రెండు గంటల పాటు ఈ వేడుకలు కొనసాగాయి. అనంతరం బతుకమ్మలను పక్కనే ఉన్న కొలనులో వేసిన మహిళలు.. పోయిరా బతుకమ్మ మళ్లీ రావమ్మా అంటూ వీడ్కోలు పలికారు. ఈ బతుకమ్మ సంబురాలను, తెలంగాణ సంస్కృతిని చూసి అక్కడి వారు హర్షం వ్యక్తం చేశారు. మున్ముందు జరిగే సంబురాలలో తామూ పాల్గొంటామని తెలిపారు.
వచ్చే ఏడాది నుంచి బతుకమ్మ సంబురాలను మరింత ఘనంగా నిర్వహిస్తామని తెలంగాణ అసోసియేషన్ ఆఫ్ ఉగాండా నిర్వాహకులు తెలిపారు. ఈ కార్యక్రమంలో వ్యవస్థాపక అధ్యక్షులు వేణుగోపాల్ రావు, ఛైర్మన్ కోటిరెడ్డి, ట్రస్టీ పార్థసారథి, జనరల్ సెక్రటరీ వసంత్ కుమార్, వైస్ ఛైర్మన్లు చంద్రకాంత్, రఘువీర్, హిరన్మయి, కల్చరల్ సెక్రటరీ పూజిత, మురళి, కార్యవర్గ సభ్యులు, తదితరులు పాల్గొన్నారు.
ఇవీ చదవండి: మలేషియాలో ఘనంగా బతుకమ్మ వేడుకలు.. హాజరైన తెలంగాణ ప్రముఖులు
