తొందరగా బ్రష్ చేస్కో కన్నా.. స్కూల్కు వెళ్లాలి. అరేయ్ నాన్న ఈ ఒక్క ముద్ద తినరా... మా బాబు కదూ.. మా బుజ్జి కదూ. ఇవండీ... పిల్లలను తల్లిదండ్రులు సముదాయించే తీరు. మొండిఘటం, పెంకితనానికి ఏ మాత్రం కొదవుండదు. ముద్దు ముద్దు మాటలతో చుట్టూ తిరిగే బుజ్జాయిల అల్లరి అంతా ఇంతా కాదు. పొరపాటున చరవాణో, టీవీ రిమోటో చేతిలోంచి లాక్కున్నామంటే అంతే సంగతులు రాగం అందుకున్నారంటే మళ్లీ ఆపేందుకు అరగంటైనా పడుతుంది. వారి ఏడుపు ఆపేందుకు తల్లిదండ్రులు పడరాని పాట్లు పడాలి. ఒకటా రెండా చెప్పుకుంటూ పోతే చాంతాండంత లిస్ట్ ఉంటుంది వారి చిలిపి పనుల చిట్టా. పిల్లలకు సరదా.... పెద్దలకు పరీక్ష అన్నట్టుగా తయారైంది చిచ్చర పిడుగుల అల్లరి.
ఇవీ చూడండి: బంగ్లాదేశ్‌ మార్కెట్‌.... ఇక్కడ అన్ని చవకే!
కౌన్సిలింగ్ సెంటర్లకు పరుగులు:
పిల్లలకు అల్లరి అందం. చిన్నారులు చేసే చిలిపి పనులను ప్రతి ఒక్కరూ ఆస్వాదిస్తారు. అది ఇప్పుడు శృతి మించుతోంది. నచ్చిన పనులు చేయకపోయినా... అడిగింది ఇవ్వకపోయినా... పిల్లలు చేస్తున్న గొడవ అంతా ఇంతా కాదు. కింద పడి దొర్లడం, చేతిలో ఉన్నవి విసరటం, గుక్కతిప్పుకోకుండా ఏడవటం వంటి అస్త్రాలు సంధిస్తున్నారు. ఏం చేయాలో పాలుపోక తలపట్టుకుని కౌన్సిలింగ్ సెంటర్లకు పరుగులు తీస్తున్నారు తల్లిదండ్రులు.
తల్లిదండ్రలే కారణం:
పిల్లలు మరీ పెంకిగా తయారవటానికి కొంత వరకు తల్లిదండ్రులే కారణం అంటున్నారు నిపుణులు. నేటి సమాజంలో ఒక్కరే ముద్దు అనే సూత్రం వల్ల ఒక్కరినే కనటం...ఒక్కడే కదా అని గారాబం చేయటం. ఒక్కోసారి భార్యాభర్తలిద్దరూ ఉద్యోగాలు చేసి వచ్చి అలసటలో పిల్లలని సముదాయించలేక అడిగింది ఇచ్చేస్తున్నారు. కాసేపు ఏడిస్తే చూడలేక కోరింది అందిస్తున్నారు. ఫలితంగా పిల్లలకు ఏడిస్తే ఏదైనా సాధించవచ్చన్న ఆలోచన వచ్చేస్తోంది. కోరింది క్షణాల్లో కావాలన్న ధోరణి తల్లిదండ్రులకు తలనొప్పిగా మారుతోంది. ఎదుటి వారితో కలవకపోవటం, ఒంటరిగా ఉండాలనుకోవటంలాంటి పోకడలకు పిల్లలు అలవాటు పడుతున్నారని మానసికవేత్తలు చెబుతున్నారు.
అతి గారాబం వద్దు:
అతి అనర్థం అంటారు పెద్దలు. పిల్లల మారానికి ఇదే వర్తిస్తుంది. గారాబం కొంత వరకు బాగానే ఉంటుంది. అడిగిందల్లా ఇవ్వటం వల్ల పిల్లల్లో మొండితనానికి దారి తీస్తోంది. మొదటి నుంచి కలివిడి తనాన్ని అలవాటు చేస్తూ... అవసరమైన వాటికి అనవరసమైన వాటికి తేడా చెప్తూ పెంచడం వల్ల కొంత వరకు ఈ సమస్యని అధిగమించవచ్చంటున్నారు నిపుణులు.
ఇవీ చూడండి: యోగాలో నయా ట్రెండ్... మీరు ట్రై చేయండి!
