ఒలింపిక్స్​లో వాటికి చోటులేదు: ఐఓసీ

ఈ ఏడాది జరగనున్న ఒలింపిక్స్​లో అథెట్ల నిరసనలు, రాజకీయ సందేశాల ప్రదర్శనపై నిషేధం కొనసాగుతుందని అంతర్జాతీయ ఒలింపిక్​ కమిటీ(ఐఓసీ) స్పష్టం చేసింది. ఏ క్రీడాకారుడైనా ఈ నిబంధనలను ఉల్లంఘిస్తే చర్యలు తీసుకుంటామని ఓ ప్రకటనలో వెల్లడించింది.

ఒలింపిక్స్​లో అథెట్ల నిరసనలు, రాజకీయ సందేశాలను ప్రదర్శించడంపై నిషేధం కొనసాగుతుందని అంతర్జాతీయ ఒలింపిక్ కమిటీ(ఐఓసీ) స్పష్టం చేసింది. దీంతో ఈ ఏడాది జరిగే టోక్యో ఒలింపిక్స్​లో పోడియంపై అథ్లెట్లు పిడికిలి పైకెత్తడం, మోకాళ్లపై కూర్చుని సంఘీభావం తెలపడం లాంటి చర్యలకు తావులేదు. ఏడాది కాలంగా 3,500 కంటే ఎక్కువ మంది అథ్లెట్లపై సర్వే నిర్వహించి వాళ్ల అభిప్రాయాలను పరిగణనలోకి తీసుకుని నిరసన చర్యలపై నిషేధం కొనసాగించాలని నిర్ణయించినట్లు ఐఓసీ ప్రకటించింది.

ఒకవేళ ఎవరైనా నిబంధనలు ఉల్లంఘించి నిరసన తెలిపితే వాళ్లపై తీసుకునే చర్యల గురించి ఐఓసీ ఇంకా స్పష్టతనివ్వలేదు. కానీ అవి తీవ్రంగానే ఉంటాయని ఐఓసీ ఎగ్జిక్యూటివ్ బోర్డు అథ్లెట్ల ప్రతినిధి కిర్​స్టీ పేర్కొన్నాడు. ఒలింపిక్స్ నియమావళిలోని 50వ నిబంధన ప్రకారం ఆ మెగా క్రీడల్లో రాజకీయ, మతపరమైన, జాతివివక్ష సందేశాలకు చోటు లేదు.

ఐఓసీ నిర్ణయంతో అమెరికా ఒలింపిక్, పారాలింపిక్ కమిటీకి ఎదురుదెబ్బ తగిలినట్లయింది. ఆ క్రీడల్లో తమ దేశ అథ్లెట్లు జాతీయ గీతం సమయంలో పిడికిలి పైకెత్తడం, మోకాళ్లపై కూర్చోవడం లాంటివి చేస్తే ఎలాంటి చర్యలు తీసుకోమని గతేడాది ఆ కమిటీ ప్రకటించింది. 'బ్లాక్ లైవ్స్ మ్యాటర్' అని రాసి ఉన్న దుస్తులు వేసుకోవచ్చని కూడా తెలిపింది. కానీ టోక్యోలో మాత్రం 'శాంతి, గౌరవం, సంఘీభావం, అంతర్భాగం, సమానత్వం' పదాలు ఉండే టీషర్ట్స్​ మాత్రమే అథ్లెట్లు ధరించాలని ఐఓసీ వెల్లడించింది.

1968 మెక్సికో ఒలింపిక్స్​లో అమెరికా జాతీయ గీతం ప్రారంభమవగానే నల్లజాతీయుల బలాన్ని చాటేలా పోడియంపై ఉన్న ఆ దేశ స్ప్రింటర్లు టామీ స్మిత్, జాన్ కార్లోస్ నల్ల బ్లౌజులు ధరించి పిడికిలి పైకెత్తారు. దీంతో వాళ్లను ఆ క్రీడల నుంచి బహిష్కరించారు. ఆ ఇద్దరికీ 2019లో యూఎస్ ఒలింపిక్ కమిటీ హాల్ ఆఫ్ ఫేమ్లో చోటిచ్చింది.

వర్చువల్ క్రీడా సిరీస్ ప్రారంభం..

ఒలింపిక్ వర్చువల్ క్రీడా సిరీస్​కు ఐఓసీ గురువారం శ్రీకారం చుట్టింది. బేస్​బాల్​, సైక్లింగ్, ఆటో రేసింగ్, రోయింగ్, సెయిలింగ్ క్రీడాంశాల్లో వచ్చే నెల 13 నుంచి జూన్ 23 వరకు ఈ వర్చువల్ పోటీలు జరుగుతాయి. ప్రపంచంలో ఎక్కడి నుంచైనా ఈ పోటీల్లో పాల్గొనవచ్చు. ఒలింపిక్స్​కు యువ అభిమానులను ఆకర్షించేందుకు ఈ వర్చువల్ టోర్నీ విధానాన్ని ఐఓసీ ఎంచుకుంది. "ఈ సిరీస్​తో వర్చువల్ క్రీడలు, ఈ-స్పోర్ట్స్, గేమింగ్ ఉత్సాహవంతులను సమీకరించి కొత్త అభిమానులను ఒలింపిక్స్ దిశగా ఆకర్షిస్తాం" అని ఐఓసీ ఓ ప్రకటనలో తెలిపింది. ఈ ఏడాది జులై 23న టోక్యో ఒలింపిక్స్ ఆరంభం కానుంది.

ఇదీ చూడండి.. ఒలింపిక్స్ టార్చ్​ రిలేలో తొలి కరోనా కేసు​