ఖతార్లో శుక్రవారం నుంచి ప్రపంచ అథ్లెటిక్స్ ఛాంపియన్షిప్ ప్రారంభం కానుంది. ప్రముఖ క్రీడాకారులైన హిమదాస్,నీరజ్ చోప్రా లేకుండానే ఈ పోటీల్లో బరిలోకి దిగుతోంది భారత బృందం. మోచేయి చికిత్స కారణంగా నీరజ్, వెన్నెముక గాయంతో హిమదాస్ ఈ టోర్నీకి దూరమయ్యారు.
2017 లండన్లో జరిగిన గత ఎడిషన్లో కేవలం ఒకే ఒక్క భారతీయ అథ్లెట్(జువెలిన్ త్రో విభాగంలో దేవిందర్ సింగ్ కంగ్) మాత్రమే ఫైనల్కు చేరాడు. రేస్ వాకర్స్, మారథాన్ క్రీడాకారులు తమ తమ విభాగాల్లో నిరుత్సాహపరిచారు.
ఇప్పుడు వెళుతున్న 27 మంది సభ్యుల భారత బృందంలో 13 మంది అథ్లెట్లు రిలేలో పాల్గొననున్నారు. ధరుణ్ అయ్యస్వామి 400 మీటర్ల హర్డిల్స్ విభాగంలో పోటీ పడనున్నాడు. జాతీయ పతక విజేత మహమ్మద్ అనాస్.. క్వాలిఫికేషన్ మార్క్ను అందుకోని కారణంగా అర్హత సాధించలేకపోయాడు.
అన్ని రిలే పరుగు పందేల్లో తొలి ఎనిమిది స్థానాల్లో నిలిచిన వారు వచ్చే ఏడాది జరిగే టోక్యో ఒలింపిక్స్లో పాల్గొనే అవకాశం పొందుతారు.
భారత అథ్లెట్లలో లాంగ్ జంపర్ శ్రీశంకర్, మెట్రిక్ రన్నర్ జిన్సన్ జాన్సన్, షాట్పుట్ క్రీడాకారుడు తేజిందర్ పాల్ సింగ్, స్ప్రింటర్ ద్యుతీ చంద్ తమ అదృష్టాన్ని పరీక్షించుకోనున్నారు. ఈ టోర్నీలో భారత ప్రయాణాన్ని ఆరంభించనున్నాడు శ్రీశంకర్.
ఇది చదవండి: అథ్లెటిక్స్: వినూత్న ఆలోచనలు.. మరెన్నో అద్భుతాలు
