'మేరీ, నిఖత్.. దేశం గర్వించదగ్గ క్రీడాకారిణులు'

మహిళా బాక్సర్లు మేరీ కోమ్, నిఖత్ జరీన్​ల మధ్య విభేదాలంటూ వస్తోన్న వార్తలపై స్పందించారు కేంద్ర క్రీడామంత్రి కిరణ్ రిజుజు. వారు దేశం గర్వించదగ్గ క్రీడాకారిణులని అన్నారు.

భారత మహిళా బాక్సర్లు మేరీకోమ్​, నిఖత్​ జరీన్​ మధ్య విభేదాలంటూ వస్తోన్న వార్తలపై ట్విట్టర్​ వేదికగా కేంద్ర క్రీడామంత్రి కిరణ్​ రిజుజు స్పందించారు. వీరిద్దరూ దేశం గర్వించదగ్గ క్రీడాకారులని అన్నారు. ఆరుసార్లు ప్రపంచ ఛాంపియన్​గా నిలిచిన మేరీ​కి, నిఖత్​ గట్టిపోటీ ఇవ్వడం గొప్ప విషయం అని చెప్పారు.

"ప్రపంచ బాక్సింగ్​ పోటీల్లో ఇప్పటివరకు ఏ క్రీడాకారిణులు సాధించని ఘనత మేరీకోమ్ సొంతం చేసుకుంది. అటువంటి మేరీపై పోరాడటానికి సిద్ధపడిన నిఖత్​.. ఓ గొప్ప క్రీడాకారిణే. వీరిద్దరినీ చూసి దేశం గర్విస్తుంది. అభిరుచి, భావోద్వేగం ఆటలకు ఆత్మ లాంటివి. ప్లేయర్ల మధ్య పగ, ప్రతీకారం ఉంటే ఆటల్లో రాణించడం కష్టం"
- కిరణ్​ రిజుజు, కేంద్ర క్రీడా మంత్రి

మేరీకోమ్-నిఖత్ జరీన్

చైనా వేదికగా ఫిబ్రవరిలో జరగనున్న ఒలింపిక్​ అర్హత పోటీల్లో చోటు కోసం మేరీకోమ్​, నిఖత్..​ శనివారం తలపడ్డారు. 9-1 తేడాతో మేరీ గెలిచింది. ఆట ముగిసిన తర్వాత ప్రత్యర్థికి కరచాలనం ఇచ్చేందుకు నిరాకరించిందీ బాక్సర్. ఆమె​పైన విమర్శలు గుప్పించింది.

నేరుగా ఎంపిక చేయడమే కారణం

చైనాలో జరిగే ఈ అర్హత పోటీలకు సెలక్షన్​ కమిటీ (బాక్సింగ్​ ఫెడరేషన్​ ఆఫ్​ ఇండియా) మేరీకోమ్​ను నేరుగా ఎంపిక చేసింది. ఇందులో స్థానం కోసం ముందుగా బౌట్​ నిర్వహించాలి. అలా చేయకుండానే మేరీని ఎంపిక చేశారు. దీనిని వ్యతిరేకిస్తూ నిఖత్​.. క్రీడా మంత్రికి లేఖ రాసింది.

మేరీకోమ్-నిఖత్ జరీన్

ఇదీ చదవండి: నేచురల్​ స్టార్​ నానితో రౌడీ హీరో మరోసారి!