2020-21 ఫుట్బాల్ ప్రీమియర్ లీగ్ విజేతగా మాంచెస్టర్ సిటీ జట్టు అవతరించింది. మాంచెస్టర్ యునైటెడ్తో జరిగిన మ్యాచ్లో లీసెస్టర్ సిటీ టీమ్ 2-1 తేడాతో గెలుపొందింది. దీంతో పాయింట్ల పట్టికలో అగ్రస్థానంలో ఉన్న మాంచెస్టర్ సిటీ జట్టునే టైటిల్ వరించింది. గత నాలుగేళ్లలో మూడో టైటిల్ను తన ఖాతాలో వేసుకుంది ఈ టీమ్.
పాయింట్ల పట్టికలో 80 పాయింట్లతో తొలి స్థానంలో ఉంది మాంచెస్టర్ సిటీ. మాంచెస్టర్ యునైటెడ్ 70 పాయింట్లతో రెండో స్థానంలో కొనసాగుతుండగా.. లీసెస్టర్ సిటీ 66 పాయింట్లతో మూడో స్థానంలో నిలిచింది. యునైటెడ్, సిటీ జట్ల మధ్య 10 పాయింట్ల తేడా ఉంది.
"2016లో మాంచెస్టర్ సిటీ మేనేజర్గా పెప్ గార్డియోలా నియామకమయ్యారు. అతని నేతృత్వంలో ఇది పదో పెద్ద టైటిల్. కరోనా ధాటికి ప్రభావితమైన క్రీడల్లో ఇదొక్కటి. అయినప్పటికీ మాంచెస్టర్ సిటీ జట్టు గొప్ప స్థిరత్వాన్ని ప్రదర్శించింది" అని మాంచెస్టర్ సిటీ తన అధికారిక వెబ్సైట్లో పేర్కొంది.
గత నెలలో ఇంగ్లీష్ లీగ్ కప్ను కైవసం చేసుకున్న సిటీ జట్టు.. తాజాగా ప్రీమియర్ లీగ్ను తన ఖాతాలో వేసుకుంది. తాజా టైటిల్తో ఇస్తాంబుల్ వేదికగా మే 29న జరిగే ఛాంపియన్స్ లీగ్ ఫైనల్కు అర్హత సాధించింది ఈ జట్టు.
ఇదీ చదవండి: 'సారీ మీరు ఇంకో రోగంతో బాధపడుతున్నారు'
