ప్రపంచ ఫుట్బాల్ దిగ్గజం, పోర్చుగల్ స్టార్ ఫుట్బాలర్ క్రిస్టియానో రొనాల్డో పుట్టినరోజు నేడు. అత్యుత్తమ ఆటతీరు, అసాధారణ నైపుణ్యంతో ప్రపంచవ్యాప్తంగా అభిమానులను సంపాదించుకున్న రొనాల్డో.. 1985 ఫిబ్రవరి 5న జన్మించాడు. పోర్చగల్ ఫుట్బాల్ జాతీయ జట్టుకు కెప్టెన్‌గా, ప్రొఫెషనల్ విభాగంలో సెరీ ఏ క్లబ్ జువెంటస్‌కు ప్రాతినిధ్యం వహిస్తున్నాడు.
రికార్డుల రారాజు రొనాల్డో..
ప్రొఫెషనల్ కెరీర్లోకి స్పోర్టింగ్ సీపీ జట్టు తరఫున అరంగేట్రం చేశాడు క్రిస్టియానో. 2003లో మాంచెస్టర్ యునైటెడ్‌కు మారాడు. అదే ఏడాది 18 సంవత్సరాల వయసులో పోర్చుగల్ తరఫున అంతర్జాతీయ కెరీర్ ప్రారంభించాడు. అద్భుత ప్రదర్శనతో 2008లో జాతీయ జట్టు పగ్గాలు చేపట్టాడు. పోర్చుగల్ తరఫున అత్యధిక గోల్స్ సాధించింది రొనాల్డోనే.
18 ఏళ్ల కెరీర్లో క్లబ్, దేశం తరఫున 860కి పైగా గోల్స్ సాధించాడు క్రిస్టియానో. 30కి పైగా పెద్ద ట్రోఫీలు గెలిచాడు. అందులో 5 ఛాంపియన్స్ లీగ్, 2 లా లిగా టైటిల్స్, 3 ప్రీమియర్ లీగ్ టైటిల్స్, 2 సెరీ ఏ టైటిల్స్, 5 సార్లు బాలన్ డి'ఓర్, 4 ఫిఫా క్లబ్ ప్రపంచ టైటిల్స్ గెలిచాడు.
అంతర్జాతీయంగా ఎక్కువ క్యాప్లు (167) సాధించిన ఫుట్బాలర్ అతడే. ఛాంపియన్స్ లీగ్ చరిత్రలో అత్యధిక గోల్స్(130), రియల్ మాడ్రిడ్ తరఫున ఎక్కువ గోల్స్(515) చేసిన ప్లేయర్ కూడా రొనాల్డోనే.
2016లో యూరోపియన్ ఛాంపియన్‌షిప్, 2019లో నేషనల్ లీగ్‌లో తన జట్టును ఛాంపియన్‌గా నిలబెట్టిన రొనాల్డో ఫుట్బాల్ చరిత్రలో ఎన్నో రికార్డును తన పేరున లిఖించుకున్నాడు.
ఇదీ చూడండి: బార్సిలోనాతో మెస్సీ ఒప్పందం విలువ ఎంతో తెలుసా?
