అమ్మాయిలు బయటికి రావడాన్ని, బయట బురఖాలు కాకుండా వేరే దుస్తులు ధరించడాన్ని ఏమాత్రం సహించరు తాలిబన్లు. అలాంటింది వాళ్లు మైదానాల్లోకి వెళ్లి ఆటలు ఆడతామంటే, పొట్టి దుస్తులు ధరిస్తామంటే ఒప్పుకుంటారా? అందుకే అఫ్గానిస్థాన్ తాలిబన్ల చేతికి చిక్కినప్పటి నుంచి తమ పరిస్థితి ఏంటా అని ఆ దేశ ఫుట్బాల్ క్రీడాకారిణులు (Soccer Players) బిక్కుబిక్కుమంటూ గడుపుతున్నారు. తమ భద్రత పట్ల తీవ్ర ఆందోళనలో ఉన్నారు. అయితే వాళ్లందరినీ సురక్షితంగా అఫ్గాన్ రాజధాని కాబుల్ నుంచి బయట పడేసింది ఆస్ట్రేలియా ప్రభుత్వం.
అఫ్గాన్ జాతీయ మహిళల సాకర్ జట్టులో భాగమైన క్రీడాకారిణులతో పాటు వారి కుటుంబ సభ్యులు, సహాయ సిబ్బంది మొత్తాన్ని ఓ ప్రత్యేక విమానంలో కాబుల్ నుంచి తరలించారు. మొత్తం 75 మందితో ఈ విమానం మంగళవారం కాబుల్ నుంచి బయల్దేరింది. 2007లో అఫ్గానిస్థాన్ జాతీయ మహిళల సాకర్ జట్టు ఏర్పాటైంది. అమ్మాయిలు ఫుట్బాల్ ఆడటాన్ని తాలిబన్లు ముందు నుంచి తీవ్రంగా వ్యతిరేకిస్తున్న నేపథ్యంలో.. ప్రస్తుత పరిస్థితుల్లో ఆ జట్టు సభ్యులను ఏం చేస్తారో అన్న ఆందోళన వ్యక్తమైంది.
ఇదీ చదవండి: paralympics 2020: బుధవారం భారత అథ్లెట్ల షెడ్యూల్ ఇదే
