Ravi Shastri on Ashwin: విదేశాల్లో భారత్ తరపున కుల్దీప్ యాదవే నంబర్ వన్ బౌలర్ అంటూ అప్పటి హెడ్కోచ్ రవిశాస్త్రి ప్రశంసించడం తట్టుకోలేకపోయానని ఇటీవల సీనియర్ స్పిన్నర్ రవిచంద్రన్ అశ్విన్ వాపోయాడు. తాజాగా ఈ విషయంపై రవిశాస్త్రి స్పందించాడు. నా వ్యాఖ్యలు అశ్విన్ను బాధించి ఉంటే అందుకు సంతోషిస్తున్నానని వ్యాఖ్యానించాడు.
"అశ్విన్ సిడ్నీ టెస్టు ఆడలేదు. ఆ స్థానంలో వచ్చిన కుల్దీప్ మంచి ప్రదర్శన చేశాడు. కుల్దీప్కు అవకాశం ఇవ్వడంలో తప్పులేదు. అది అశ్విన్ను బాధించి ఉంటే అందుకు నేను సంతోషిస్తాను. ఆ తర్వాతే అతను వినూత్నంగా ఆడేందుకు ప్రయత్నిస్తున్నాడు. మీ కోచ్ మీకు సవాల్ విసిరితే మీరు ఏం చేస్తారు? ఇంట్లో ఏడుస్తూ కూర్చుంటారా? నేనైతే ఓ ఆటగాడిగా ఆ సవాల్ను స్వీకరించి కోచ్ అంచనాలు తప్పు అని నిరూపిస్తాను."
-రవిశాస్త్రి, టీమ్ఇండియా మాజీ హెడ్కోచ్
2019 సిడ్నీ టెస్ట్లో అశ్విన్ స్థానంలో కుల్దీప్ను ఎంపిక చేసింది జట్టు యాజమాన్యం. ఆ టెస్టులో కుల్దీప్ ఐదు వికెట్లు పడగొట్టి మెరుగైన ప్రదర్శన చేశాడు. ఈ నేపథ్యంలో మ్యాచ్ తర్వాత రవిశాస్త్రి.. కుల్దీప్ యాదవే నంబర్ వన్ బౌలర్ అంటూ వ్యాఖ్యలు చేశాడు.
అయితే ఆ మ్యాచ్ తర్వాత కుల్దీప్ ఫామ్ కోల్పోవడం గమనార్హం. మరోవైపు అశ్విన్ ప్రస్తుతం టెస్టు జట్టులో కీలక ఆటగాడిగా ఉన్నాడు. రానున్న దక్షిణాఫ్రికా సిరీస్లో భాగంగా అశ్విన్పై భారీ అంచనాలే ఉన్నాయి.
ఇదీ చూడండి : Ind vs SA: సఫారీ గడ్డపై కూడా ఈ వేగం కొనసాగనీ..
