Pakistan Cricket News: సొంతగడ్డపై పెద్ద జట్లతో అంతర్జాతీయ క్రికెట్ సిరీస్లు నిర్వహించాలనే పాకిస్థాన్ ప్రయత్నాలు ఎట్టకేలకు ఫలించినట్లున్నాయి. గతేడాది న్యూజిలాండ్, ఇంగ్లాండ్ వంటి జట్లు తొలుత ఒప్పుకొని, చివరి క్షణంలో భద్రతా లోపాలను కారణాలుగా చూపుతూ రద్దు చేసుకున్నాయి. మరికొన్ని గంటల్లో మ్యాచ్ ఉంది అనగా కివీస్ జట్టు తిరుగు ప్రయాణమై పాక్కు షాక్ ఇచ్చింది. అయితే క్రికెట్ ఆస్ట్రేలియా తమ జట్టును పాక్లో పర్యటించేందుకు ఆమోదం తెలిపి, ఆతిథ్య జట్టుకు ఆనందపరిచింది. షెడ్యూల్ కూడా రిలీజ్ చేసింది.
24 ఏళ్ల తర్వాత మళ్లీ..
భారత్, ఇంగ్లాండ్, న్యూజిలాండ్ వంటి జట్లు పాకిస్థాన్లో ఆడి దశాబ్దకాలానికిపైగా అయింది. కానీ కంగారూలు పాక్ గడ్డపై అడుగుపెట్టి అంతకన్నా ఎక్కువ కాలమే అయింది. 24 ఏళ్ల క్రితం ఆసీస్ పాకిస్థాన్లో పర్యటించింది. సుదీర్ఘ కాలం ఆసీస్ తమ గడ్డపై ఆడుతున్న నేపథ్యంలో ఈ పర్యటనను ప్రతిష్ఠాత్మకంగా తీసుకుంది పాక్ క్రికెట్ బోర్డు.
తమ దేశంలో ఆస్ట్రేలియా పర్యటించడంపై పాకిస్థాన్ క్రికెట్ బోర్డు హర్షం వ్యక్తం చేసింది. ఆసీస్కు ఆతిథ్యం ఇచ్చేందుకు ఆసక్తిగా ఎదురుచూస్తున్నామని తెలిపింది.
పాక్ జట్టుతో కంగారూలు మూడు టెస్టులు, మూడు వన్డేలు సహా ఓ టీ20లో తలపడనున్నారు. మార్చి 4 నుంచి ఏప్రిల్ 5 మధ్య ఈ మ్యాచ్లు జరుగుతాయి.
మ్యాచ్ తేదీలు ఇవే..
- తొలిటెస్టు - మార్చి 4 నుంచి 8 - రావల్పిండి
- రెండో టెస్టు - మార్చి 12 నుంచి 16 - కరాచీ
- మూడో టెస్టు - మార్చి 21 నుంచి 25 - లాహోర్
- మొదటి వన్డే - మార్చి 29 - రావల్పిండి
- రెండో వన్డే - మార్చి 31- రావల్పిండి
- మూడో వన్డే - ఏప్రిల్ 2 - రావల్పిండి
- టీ20 - ఏప్రిల్ 5 - రావల్పిండి
ఈసారైనా..?
అంతర్జాతీయంగా పాక్ జట్టు మంచి ప్రదర్శలు ఇస్తున్నా.. ఆ జట్టు సొంతగడ్డలో పర్యటించేందుకు బడా జట్లు సంకోచిస్తున్నాయి. గతేడాది న్యూజిలాండ్, ఇంగ్లాండ్ జట్ల యాజమాన్యం ప్రదర్శించిన వైఖరి అందుకు ఉదాహరణ. ఈ నేపథ్యంలో ఆసీస్ పర్యటన ప్రాధాన్యం సంతరించుకుంది. మరి ఈసారైనా సొంతగడ్డపై బడా జట్లతో సిరీస్ నిర్వహించాలన్న పాక్ కల నెలవేరుతుందా?
ఇదీ చూడండి : పాక్ పేసర్ బౌలింగ్పై నిషేధం- కారణం ఇదే..
