IPL Auction: గతేడాది రూ. 9 కోట్లు.. ఇప్పుడు 90 లక్షలు- ఎవరా ప్లేయర్​?

IPL Auction Updates: ఓడలు బండ్లు.. బండ్లు ఓడలవుతాయి అంటారు తెలుసా? అచ్చం ఈ ప్లేయర్​కు అదే వర్తిస్తుంది. ఐపీఎల్​ 2022 వేలంలో ఇదే జరిగింది. గతేడాది మినీవేలంలో అతడిని చెన్నై సూపర్​ కింగ్స్​ రూ. 9.25 కోట్ల రికార్డు ధరకు కొనుగోలు చేసింది. ఇప్పుడదే ప్లేయర్​.. రూ. 90 లక్షలకే కోల్​కతా సొంతమయ్యాడు. ఇంతకీ ఎవరా ప్లేయర్?

Krishnappa Gowtham: అంతర్జాతీయ అరంగేట్రం చేయని ఆటగాళ్లలో ఐపీఎల్​లో అత్యధిక ధర పలికిన క్రికెటర్​గా నిలిచాడు అవేశ్​ ఖాన్​. ఇతడిని లఖ్​నవూ.. ఐపీఎల్​ మెగావేలం తొలిరోజు రూ. 10 కోట్లకు సొంతం చేసుకుంది.

అయితే అంతకుముందు ఈ రికార్డు కృష్ణప్ప గౌతమ్​ పేరిట ఉండేది. ఈ ఆల్​రౌండర్​ను గతేడాది మినీవేలంలో చెన్నై సూపర్​ కింగ్స్​ రూ. 9.25 కోట్ల రికార్డు ధరకు కొనుగోలు చేసింది. కానీ ఈసారి అంతా తలకిందులైంది.

అప్పుడు రూ. 9 కోట్లకుపైనే పెట్టిన ఫ్రాంఛైజీలు ఈసారి పెద్దగా ఆసక్తి చూపలేదు. దీంతో కృష్ణప్ప.. రూ. 90 లక్షలకే లఖ్​నవూ సూపర్​ జెయింట్స్​ సొంతమయ్యాడు. రూ. 50 లక్షల బేస్​ప్రైజ్​కు వేలంలోకి వచ్చిన గౌతమ్​ కోసం కోల్​కతా, దిల్లీ కూడా పోటీపడినా.. లఖ్​నవూ దక్కించుకుంది.

2021లో ప్యాట్​ కమిన్స్​ను రూ. 15.50 కోట్ల రికార్డు ధరకు దక్కించుకున్న కోల్​కతా.. ఈసారి రూ. 7.25 కోట్లకే సొంతం చేసుకుంది. ఇతడి ధర కూడా సగానికిపైగా తగ్గింది.

వారు మాత్రం..

ఇతడి పరిస్థితి ఇలా ఉంటే.. గతేడాది లక్షల్లో తీసుకున్న కొందరు ప్లేయర్ల గతి తిరిగింది. అవేశ్​ ఖాన్​.. గత సీజన్​లో రూ. 70 లక్షలకే దిల్లీకి ఆడాడు. ఇప్పుడు లఖ్​నవూ రూ. 10 కోట్లకు కొనుక్కుంది.

• 2021లో ఆర్సీబీకి రూ. 20 లక్షలకే ఆడిన హర్షల్​ పటేల్​.. అదే జట్టుకు ఇప్పుడు రూ. 10.75 కోట్లకు అమ్ముడుపోయాడు.
• రూ. 75 లక్షలకే రాయల్స్​కు ఆడిన లివింగ్​ స్టోన్​ను ఈసారి రూ. 11.50 కోట్లకు దక్కించుకుంది పంజాబ్​.
• రూ. 80 లక్షలకు చెన్నైకి ఆడిన దీపక్​ చాహర్​ను.. ఈసారి అదే జట్టు రూ. 14 కోట్లకు వేలం పాడి సొంతం చేసుకుంది.

ఇంకా ఈ లిస్టులో చాలా మందే ఉన్నారు.

ఇవీ చూడండి: 'రాహుల్స్​' దశ తిరిగింది- వేలంలో కోట్లకు కోట్లు..!