ఇండియన్ ప్రీమియర్ లీగ్.. ప్రపంచంలోనే అత్యంత పేరొందిన క్రికెట్ లీగ్. పదహారేళ్లుగా సాగుతోన్న ఈ లీగ్లో ఎందరో టాప్ క్రికెటర్లు పాల్గొని అభిమానులను ఆకట్టుకున్నారు. వారందరికీ ఈ లీగ్లో కొన్ని మధుర జ్ఞాపకాలు, మర్చిపోలేని సంగతులు, ఫేవరెట్ ప్లేయర్స్.. ఇలా ఎన్నో ఉంటాయి. అయితే అలాంటివే తనకు కూడా ఉన్నాయని అన్నాడు ఆర్సీబీ స్టార్ బ్యాటర్ కోహ్లీ. తనకు ఇష్టమైన ఆటగాళ్ల గురించి కూడా ఐపీఎల్ బ్రాడ్కాస్టర్ జియో టీవీతో పంచుకున్నాడు. ఐపీఎల్ ఎంతో మంది ఉత్తమ ఆటగాళ్లను అందించిందని చెప్పాడు. అలాగే సీఎస్కే కెప్టెన్ ధోనీ గురించి కూడా మాట్లాడాడు.
ఐపీఎల్లో తన గ్రేటెస్ట్ ఆఫ్ ఆల్ టైమ్ ఫేవరెట్ ఎవరు అని కోహ్లీని అడగగా.. మరో ఆలోచన లేకుండా ఏబీ డివిలియర్స్, లసిత్ మలింగల పేర్లు చెప్పాడు. అయితే డివిలియర్స్తో తన అనుబంధాన్ని గురించి విరాట్ ఇప్పటికే ఎన్నో ఇంటర్వూల్లో స్పష్టం చేశాడు. ఇక శ్రీలంకకు చెందిన పేసర్ మలింగ గురించి చెప్పడం ఇదే తొలిసారి.
ఆల్ టైమ్ ఆల్రౌండర్ అని అడిగిన ప్రశ్నకు సమాధానంగా ఆస్ట్రేలియన్ దిగ్గజం షేన్ వాట్సన్ అని బదులిచ్చాడు. వెస్టిండీస్ దిగ్గజం వివ్ రిచర్డ్ను లెజెండరీ బ్యాటర్గా పేర్కొన్నాడు.2016 రాయ్పూర్ వేదికగా జరిగిన చివరి లీగ్ మ్యాచ్లో దిల్లీ క్యాపిటల్స్పై ఆర్సీబీ విజయం సాధించి నేరుగా ప్లే ఆఫ్స్కు చేరుకోవడం.. ఐపీఎల్ చరిత్రలో తనకు బెస్ట్ మూమెంట్ అని చెప్పాడు.
చెన్నై సూపర్ కింగ్స్ రాయల్, ఛాలెంజర్స్ బెంగళురు మధ్య జరిగే ప్రతీ మ్యాచ్ను ఎంజాయ్ చేస్తానని కోహ్లీ పేర్కొన్నాడు. ఇకపోతే ఈ ఇరు జట్లు 31 సార్లు తలపడగా ఆర్సీబీ 10 మ్యాచ్ల్లో గెలుపొందగా... చెన్నై 20 మ్యాచ్ల్లో నెగ్గింది. ఒక దాంట్లో ఫలితం తేలలేదు. చెన్నైపై అత్యధిక పరుగులు సాధించిన ఆటగాళ్ల జాబితాలో విరాట్ 37.88 సగటుతో 985 పరుగులతో రెండో స్థానంలో ఉన్నాడు.
ఇంకా మరిన్ని ప్రశ్నలకు సమాధానాలు ఇచ్చాడు విరాట్. ధోనీ నుంచి బెగ్, బారో(అప్పు), స్టీల్(దొంగతనం) ఏం చేస్తారు అని అడగగా.. క్వాడ్రీసెప్స్(తొడ కండరాలు)ను బెగ్ చేస్తాను, కావ్స్(కాలి వెనక భాగంలో మోకాలి నుంచి మడమ వరకు ఉండే భాగం)ను అప్పుగా తీసుకుంటాను, కంపోజర్(ప్రశాంతత)ను దొంగిలిస్తాను అని కోహ్లీ చెప్పాడు.
సునీల్ నరైన్, రషీద్ ఖాన్లలో బెస్ట్ టీ20 బౌలర్ ఎవరు అని అడగగా.. రషీద్ అని బదులిచ్చాడు. డివిలియర్స్, క్రిస్ గేల్లు ఇద్దరిలో ఎవరితో కలిసి బ్యాటింగ్ను ఎంజాయ్ చేస్తారని అడగగా.. నవ్వుతూ డివిలియర్స్తో అని అన్నాడు. క్రికెటర్లు కాకుండా ఇతర క్రీడకు చెందిన ఆటగాళ్లలో ఎవరిని డిన్నర్కు ఆహ్వానిస్తారు అన్న ప్రశ్నకు.. క్రిస్టియానో రొనాల్డొ, రోజర్ ఫెడరర్, మైఖెల్ జోర్డన్ల పేర్లు చెప్పాడు.
ఆర్సీబీ నుంచి తప్పుకుందామనుకున్నా.. విరాట్ ఒకప్పుడు ఆర్సీబీ నుంచి వైదొలగాలని అనుకున్నాడట. గతంలో తనకు 5,6 స్థానాల్లో బ్యాటింగ్ ఇవ్వడమే ఆ ఆలోచనకు కారణం అని చెప్పాడు. అప్పట్లో తనను జట్టులోకి తీసుకోమని మరో ఫ్రాంచైజీనీ కూడా సంప్రదించారట. అయితే ఇందంతా పదేళ్ల క్రితం విషయమని చెప్పాడు.
