లీగ్​లో దున్నేసి.. టీమ్​ఇండియాపై కన్నేసి!

ఐపీఎల్​.. యువ ఆటగాళ్లకు ఓ వరం. స్టార్ ఆటగాళ్లతో పాటు దిగ్గజ కోచింగ్ సిబ్బంది​తో ప్రయాణం చేయడం వల్ల వారూ రాణించడానికి ఎంతో ఆస్కారం ఉంది. కెరీర్​లో మెలకువలు నేర్చుకునేందుకు మేలైన ప్లాట్​ఫామ్​గా నిలుస్తోన్న టోర్నీ..​ ఈ సీజన్​లో కొంతమంది అద్భుతమైన యువ ఆటగాళ్లకు పరిచయం చేసింది. అలా లీగ్​లో రాణించి టీమ్ఇండియా గడప తొక్కేందుకు ఎదురుచూస్తోన్న యువ ఆటగాళ్లపై ఓ లుక్కేద్దాం.​

ఐపీఎల్‌ అంటేనే ప్రతిభ ఉన్న ఆటగాళ్లకు టీమ్‌ఇండియాలోకి ఎంపికయ్యే అవకాశం కల్పించే ఓ గొప్ప వేదిక. ప్రస్తుత జట్టులో కీలక ఆటగాళ్లుగా ఎదిగిన చాలా మంది అలా వచ్చినవారే! ఈ పదమూడో సీజన్‌లోనూ తమ నైపుణ్యాలతో సత్తాచాటిన కొంత మంది భారత కుర్రాళ్లు.. జాతీయ జట్టు తలుపు తట్టే దిశగా సాగుతున్నారు. ఇప్పటికే కోల్‌కతా నైట్‌రైడర్స్‌ మిస్టరీ స్పిన్నర్‌ వరుణ్‌ చక్రవర్తి.. ఆస్ట్రేలియా పర్యటనకు ప్రకటించిన భారత టీ20 జట్టులో చోటు దక్కించుకోగా.. తాము కూడా అదే బాటలో ప్రయాణించి అంతర్జాతీయ క్రికెట్లో అరంగేట్రం చేస్తామంటున్నారు ఈ ఆటగాళ్లు. మరి ఆ క్రికెటర్లు ఎవరూ? ఈ సీజన్‌లో వాళ్ల ప్రదర్శన ఎలా ఉందో చూసేద్దాం.

పడిక్కల్ మెరుస్తున్నాడు

దేవ్​దత్ పడిక్కల్

దేశవాళీల్లో మెరుపులతో ఐపీఎల్‌-13కు ముందే 20 ఏళ్ల దేవ్‌దత్‌ పడిక్కల్‌పై భారీ అంచనాలు ఏర్పడ్డాయి. అతణ్ని బెంగళూరు ఓపెనర్‌గా పంపించింది. తొలిసారి ఐపీఎల్‌లో ఆడుతున్నాననే భయం, బెరుకు లేకుండా నిలకడతో పరుగులు చేసుకుంటూ వెళ్తున్నాడు. లీగ్‌ దశలో 14 మ్యాచ్‌ల్లో 472 పరుగులు చేసిన అతను తన జట్టు ప్లేఆఫ్‌ చేరడంలో కీలక పాత్ర పోషించాడు. ఇప్పటికే అయిదు అర్ధశతకాలు నమోదు చేసిన ఈ ఎడమ చేతివాటం బ్యాట్స్‌మన్‌.. భారత్‌కు ఆడకుండా అరంగేట్ర ఐపీఎల్‌ సీజన్‌లో అత్యధిక అర్ధసెంచరీలు చేసిన ఆటగాడిగా నిలిచాడు. ఓపెనర్‌గా వచ్చి క్రమం తప్పకుండా పరుగులు చేస్తున్న పడిక్కల్.. ఆర్సీబీ ప్రధాన బ్యాట్స్‌మెన్‌ కోహ్లీ, డివిలియర్స్‌పై భారం తగ్గిస్తున్నాడు. అతను ఇదే జోరు కొనసాగిస్తే మరో ఏడాదిలోపు కచ్చితంగా జాతీయ జట్టుకు ఎంపికయ్యే అవకాశాలున్నాయి.

సత్తాచాటుతున్న సూర్య కుమార్

సూర్యకుమార్

సూర్యకుమార్‌ యాదవ్​ను ఆస్ట్రేలియా పర్యటనకు ఎంపిక చేయకపోవడంపై పెద్ద ఎత్తున విమర్శలు వస్తున్నాయంటే.. అతనెలా ఆడుతున్నాడో అర్థం చేసుకోవచ్చు. కొన్నేళ్లుగా ఆడిన ప్రతి ఐపీఎల్‌లో సీజన్‌లోనూ సూర్య అదరగొడుతున్నాడు. ఈ సీజన్‌లో ఇప్పటికే 410 పరుగులు చేసి.. ముంబయి విజయాల్లో కీలక పాత్ర పోషించాడు. కొన్నేళ్లుగా దేశవాళీల్లో, ఐపీఎల్‌లో అతను రాణిస్తున్నప్పటికీ జాతీయ జట్టులో చోటు దక్కడం లేదు. ఆ కసితో సెలక్షన్‌ జరిగిన తర్వాతి రోజే అతను ఆర్సీబీపై 43 బంతుల్లోనే అజేయంగా 79 పరుగులు చేశాడు. సూర్యను విస్మరించడంపై ఇప్పటికే విమర్శలు ఎదుర్కొంటున్న సెలక్షన్‌ కమిటీ రాబోయే సిరీస్‌ల కోసం సూర్యకుమార్‌ను పరిగణలోకి తీసుకోకతప్పదు. అలాగే ముంబయికే ఆడుతున్న ఇషాన్‌ కిషాన్‌ కూడా ఈ సీజన్‌లో మెరుపులు మెరిపిస్తున్నాడు. ఈ సీజన్‌లో ఆడిన తొలి మ్యాచ్‌లోనే ఆర్సీబీపై 99 పరుగులు చేసిన ఈ 22 ఏళ్ల కుర్రాడు..12 మ్యాచ్‌ల్లో 42.55 సగటుతో 428 పరుగులు చేశాడు.

చివర్లో దంచికొట్టిన గైక్వాడ్

రుతురాజ్ గైక్వాడ్