అబుదాబి వేదికగా జరిగిన మ్యాచ్లో దిల్లీ కాపిటల్స్ను తక్కువ పరుగులకే కట్టడి చేసి విజయాన్ని తమ ఖాతాలో వేసుకుంది సన్ రైజర్స్ హైదరాబాద్. అయితే, ఈ మ్యాచ్లో నాలుగు ఓవర్లలో 17 డాట్ బాల్స్ వేసిన రషీద్ ఖాన్... టీ20ల్లో తాను ఉత్తమ బౌలర్లలో ఒకడని మరోసారి నిరూపించుకున్నాడు. ఈ మ్యాచ్లో 1.80 ఎకానమీ నమోదు చేసి వాహ్ అనిపించాడు.
4 ఓవర్లలో పరుగులు ఇలా..
220 పరుగుల లక్ష్యంతో బరిలోకి దిగిన దిల్లీ బ్యాట్స్మెన్కు రషీద్ ఖాన్ చెమటలు పట్టించాడు. నాలుగు ఓవర్లలో ఏడే పరుగులిచ్చి మూడు కీలక వికెట్లు తీశాడు. దీంతో 19 ఓవర్లలో 131 పరుగులే చేయగలిగింది దిల్లీ.
ఈ సీజన్లో ఇప్పటివరకు 12 మ్యాచ్లాడిన రషీద్.. 17 వికెట్లు తీశాడు. అత్యధిక వికెట్లు తీసిన వారిలో రబాడ(23), మహమ్మద్ షమి(20) తర్వాతి స్థానంలో ఉన్నాడు.
పరుగులు ఇవ్వకపోవడమే లక్ష్యంగా
ప్రత్యర్థికి పరుగులివ్వకుండా డాట్ బాల్స్ వేయడమే తన లక్ష్యమని దిల్లీతో మ్యాచ్ అనంతరం రషీద్ఖాన్ చెప్పాడు. వికెట్లు తీయడమే లక్ష్యంగా బౌలింగ్ చేయనని అన్నాడు. ఎంతటి బ్యాట్స్మెన్నైనా పరుగులు చేయకుండా కట్టడి చేసేందుకు ప్రయత్నిస్తానని తెలిపాడు.
2017లో ఐపీఎల్లో అడుగుపెట్టిన రషీద్.. డాట్ బాల్స్ ఎక్కువగా వేసిన తొలి ఐదుగురు బౌలర్లలో ఒకడిగా ఉన్నాడు.
ఇదీ చదవండి:పంజాబ్ వరుస విజయాలకు కారణాలివే!
