ముంబయి ఇండియన్స్.. ఐపీఎల్ చరిత్రలో ఘనమైన రికార్డున్న జట్టు. ఏకంగా నాలుగు సార్లు టైటిల్ విజేతగా నిలిచింది. కానీ యూఏఈలో ఈ జట్టు గణాంకాలు చూస్తే ఏమాత్రం బాగాలేవు. స్వదేశీ పిచ్లపై పులి అయితే అక్కడ పిల్లి అని చెప్పుకోవచ్చు. అక్కడ ఆడిన ఒక్క మ్యాచ్లోనూ ముంబయి గెలవలేదంటే పరిస్థితి అర్థం చేసుకోవచ్చు. ఆడిన ఐదు మ్యాచ్ల్లో కోల్కతా నైట్రైడర్స్, రాయల్ ఛాలెంజర్స్ బెంగళూరు, చెన్నై సూపర్ కింగ్స్, దిల్లీ క్యాపిటల్స్, సన్రైజర్స్ హైదరాబాద్ చేతిలో ఓటమి పాలైంది. ఇందులో మూడు మ్యాచ్లు దుబాయ్లో జరగగా, ఒకటి షార్జా, మరొకటి అబుదాబిలో జరిగాయి. నేడు చెన్నై సూపర్ కింగ్స్తో రోహిత్ సేన తమ తొలి మ్యాచ్లో అమీతుమీ తేల్చుకోనుంది. ఈ నేపథ్యంలో అక్కడి పిచ్లపై ముంబయి గణాంకాలు ఎలా ఉన్నాయో చూద్దాం.
- ముంబయి ఆటగాళ్లు అక్కడి పిచ్లపై రెండు అర్ధ శతకాలు నమోదు చేశారు. ఇందులో రోహిత్ శర్మ ఒక హాఫ్ సెంచరీ బాదగా, పొలార్డ్ మరో అర్ధశతకం చేశాడు.
- యూఏఈ గడ్డపై ముంబయి ఆటగాళ్లు కోరె అండర్సన్, హర్భజన్ సింగ్, రోహిత్ శర్మ, వికెట్ కీపర్ సీఎం గౌతమ్ చెరో రెండు క్యాచ్లు పట్టారు. ఈ జట్టు తరఫున ఇవే అత్యధిక క్యాచ్లు.
- ఈ జట్టు తరఫున అత్యుత్తమ బౌలింగ్ ప్రదర్శన లసిత్ మలింగ పేరు మీద ఉంది. కోల్కతా నైట్రైడర్స్తో జరిగిన మ్యాచ్లో ఇతడు 23 పరుగులిచ్చి 4 వికెట్లు తీశాడు. అలాగే ఈ జట్టు తరఫున యూఏఈలో ఇతడివే అత్యధిక వికెట్లు. మొత్తం 8 వికెట్లు పడగొట్టాడు.
- పొలార్డ్ ఇక్కడ ఎనిమిది సిక్సులు బాదాడు. ముంబయి జట్టు తరఫున ఓ ఆటగాడి అత్యధిక సిక్సులు ఇవే.
- యూఏఈలో మొత్తం ముంబయి జట్టు 15 సిక్సులు బాదింది.
- అక్కడ ముంబయి తరఫున అత్యధిక స్కోరు పొలార్డ్ పేరిట ఉంది. సన్రైజర్స్తో జరిగిన మ్యాచ్లో 78 పరుగులు చేశాడు.రోహిత్, డికాక్
- రాయల్ ఛాలెంజర్స్ బెంగళూరుతో జరిగిన మ్యాచ్లో ముంబయి 9 వికెట్ల నష్టానికి 115 పరుగులు చేసింది. అక్కడ ఈ జట్టు అత్యల్పం ఇదే.
- సన్రైజర్స్తో జరిగిన మ్యాచ్లో 7 వికెట్ల నష్టానికి 157 పరుగులు చేసింది. యూఏఈలో ఈ జట్టుకు ఇదే అత్యధిక స్కోరు.
- యూఏఈలో ముంబయి జట్టు తరఫున రాయుడు 133 పరుగులు చేశాడు. ఇక్కడ ఈ జట్టు తరఫున అత్యధిక పరుగుల వీరుడు ఇతడే.
