తమ ఆటగాళ్ల తప్పిదాల వల్లే ముంబయి చేతిలో ఓడిపోయామని పంజాబ్ కెప్టెన్ కేఎల్ రాహుల్ అన్నాడు. గురువారం జరిగిన మ్యాచ్లో 48 పరుగుల తేడాతో ఓడింది పంజాబ్. మ్యా్చ్ అనంతరం ఓటమిపై స్పందించాడు రాహుల్.
గత నాలుగు మ్యాచుల్లో మూడింటిలో ఓటమి పాలయ్యాం. ఇది చాలా బాధగా ఉంది. ఈ మ్యాచ్లోనూ కొన్ని పొరపాట్లు చేశాం. త్వరగా సరిదిద్దుకోవడం మాకు చాలా ముఖ్యం.
-కేఎల్ రాహుల్, కింగ్స్ ఎలెవన్ పంజాబ్ సారథి
ముంబయి విజయంలో రోహిత్‌ శర్మ (70), పొలార్డ్(47), పాండ్య(30) కీలక పాత్ర పోషించారు. చివర్లో దిగిన పొలార్డ్, పాండ్య వరుస బౌండరీలు, కళ్లు చెదిరే సిక్సర్లతో విరుచుకుపడ్డారు. ఆఖరి 6 ఓవర్లలో 104 పరుగులు సాధించడం విశేషం.
ఈ మ్యాచ్లో 25 పరుగులు చేసిన మయాంక్ అగర్వాల్(పంజాబ్) ఆరెంజ్ క్యాప్ సొంతం చేసుకున్నాడు. ప్రస్తుతం 246 పరుగులతో ఉన్నాడు.
"ఈ క్యాప్ పంజాబ్ జట్టులో ఉన్నంత వరకు నేను సంతోషంగా ఉంటా. మయాంక్ ఎంతో కష్టపడతాడు. అందుకే ఇది వరించింది. అయినా త్వరలోనే అతడి నుంచి నేను తీసేసుకుంటాను" అని కేఎల్ రాహుల్ చెప్పాడు.
అబుదాబి వేదికగా జరిగిన మ్యాచ్లో 48 పరుగుల తేడాతో ముంబయి గెలిచింది. 193 పరుగుల లక్ష్య ఛేదనలో భాగంగా 143 పరుగులే చేయగలిగింది పంజాబ్. రాహుల్ చాహర్, బుమ్రా, ప్యాటిన్సన్ తలో రెండు వికెట్లు తీశారు. ఫలితంగా పాయింట్ల పట్టికలో అగ్రస్థానానికి చేరింది ముంబయి జట్టు. పంజాబ్ ఆరో స్థానంలో ఉంది.
