IND vs SA: ఇప్పటివరకు విదేశాల్లో టీమ్ఇండియా టెస్టు సిరీస్‌ను గెలవని ఏకైక జట్టు దక్షిణాఫ్రికా. అందుకే ఈసారి ఎలాగైనా సరే గెలిచి సరికొత్త రికార్డు సృష్టించాలని భావిస్తుంది కోహ్లీసేన. ఈ మేరకు పదునైన వ్యూహాలను సిద్ధం చేసుకుంటుంది. ఇంకో రెండు రోజుల్లో దక్షిణాఫ్రికాతో జరగబోయే తొలి టెస్టు మ్యాచ్లో టీమ్ఇండియా ఐదుగురు బౌలర్ల వ్యూహంతో బరిలోకి దిగే యోచనలో ఉన్నట్లు వైస్ కెప్టెన్ కేఎల్ రాహుల్ తెలిపాడు.
IND vs SA Test series: డిసెంబరు 26న ప్రారంభమయ్యే తొలి టెస్టులో టీమ్ ఇండియా శుభారంభం చేస్తుందని అభిప్రాయం వ్యక్తం చేశాడు. వర్చువల్గా జరిగిన విలేకర్లు సమావేశంలో.. నలుగురు బౌలర్లతో ఆడితే పనిభారం పెరుగుతుందా అని విలేకరి అడిగిన ప్రశ్నకు సానుకూలంగా బదులిచ్చాడు రాహుల్.
"ప్రతిజట్టు టెస్టులో గెలవడానికి 20 వికెట్లు తీయాలని భావిస్తుంది. మేమూ అదే వ్యూహాంతో ముందుకెళ్తాం. అలా ఆడిన ప్రతిసారి కలిసొచ్చింది. ఐదుగురు బౌలర్లతో బరిలోకి దిగితే పనిభారం కాస్త తగ్గుతుంది. కాబట్టి ఆ వ్యూహంతో టెస్టు మ్యాచ్ ఆడాలనే యోచిస్తున్నాం" అని రాహుల్ పేర్కొన్నాడు. దీంతో నాలుగో పేసర్ను ఆడించనున్నట్లు తెలుస్తోంది.
ఐదోస్థానంలో ఎవరిని పంపాలో?
KL Rahul on Rahane: మరోవైపు అజింక్యా రహానె, శ్రేయస్ అయ్యర్లలో ఎవరిని జట్టులోకి తీసుకోవాలో తేల్చుకోవడం సవాలుగా మారిందని కేఎల్ రాహుల్ అన్నాడు.
"ఈ విషయంలో నిర్ణయం తీసుకోవడం చాలా కష్టం. టెస్టు టీమ్లో రహానె కీలక ఆటగాడు. అతని కెరీర్లో ఎన్నో కీలక మ్యాచ్లు ఆడాడు. గడిచిన 15 నుంచి 18 నెలల్లో జరిగిన మ్యాచ్లోనూ జట్టు ఆపదలో ఉన్నప్పుడు తన సత్తా చాటాడు. మరోవైపు శ్రేయస్ అయ్యర్.. అరంగేట్ర టెస్టు మ్యాచ్లో సెంచరీ, అర్ధ సెంచరీతో చెలరేగి.. మంచి ఉత్సాహంతో ఉన్నాడు. హనుమ విహారి కూడా ఇదే ఊపు కనబరుస్తున్నాడు. కాబట్టి ఎవరిని టీమ్లోకి తీసుకోవాలన్నది కఠిన సవాలే"
- వైస్కెప్టెన్ కేఎల్ రాహుల్
గాయం కారణంగా టెస్టు సిరీస్కు రోహిత్ శర్మ దూరమవగా.. వైస్కెప్టెన్ బాధ్యతలను రాహుల్కు అప్పగించారు. ఈ నేపథ్యంలో మాట్లాడిన రాహుల్.. 'నేను ఎప్పుడూ బాధ్యతలను ఆస్వాదిస్తాను. ఓపెనర్గా శుభారంభం అందించాల్సిన బాధ్యత ఉంది. అలాగే సారథి విరాట్పై ఒత్తిడి తగ్గించాల్సిన అవసరముందని భావిస్తున్నాను' అని పేర్కొన్నాడు.
భారత్-దక్షిణాఫ్రికా తొలి టెస్టు డిసెంబర్ 26-30, రెండో టెస్టు జనవరి 03-07, ఆఖరి టెస్టు జనవరి 11-15 వరకు జరుగుతుంది. జనవరి 19, 21, 23వ తేదీల్లో మూడు వన్డేలు జరుగుతాయి.
ఇదీ చూడండి: 'కోహ్లీకి బౌలింగ్ చేయడం కష్టమే.. కానీ!'
