ఐసీసీ మంగళవారం విడుదల చేసిన ర్యాంకింగ్స్లో(ICC Rankings) వెస్టిండీస్ మహిళల జట్టు సారథి స్టెఫానీ టేలర్ దూసుకెళ్లింది. వన్డే బ్యాట్స్ఉమెన్ జాబితాలో నాలుగు, ఆల్రౌండర్ విభాగంలో రెండు స్థానాలను మెరుగుపరుచుకుని 766, 435 పాయింట్లతో అగ్రస్థానాన్ని కైవసం చేసుకుంది. దీంతో తొలి ర్యాంకుల్లో ఉన్న టీమ్ఇండియా మహిళా కెప్టెన్ మిథాలీ రాజ్(బ్యాటింగ్ విభాగం), ఆస్ట్రేలియా ప్లేయర్ ఎల్లిస్ పెర్రీ(ఆల్రౌండర్ విభాగం) రెండో స్థానానికి పడిపోయారు.
ప్రస్తుతం పాకిస్థాన్తో సిరీస్ ఆడుతోంది విండీస్. ఇందులో భాగంగా ఇటీవల జరిగిన తొలి వన్డేలో తమ జట్టు ఐదు వికెట్ల తేడాతో విజయం సాధించడంలో టేలర్ కీలకంగా వ్యవహరించింది. మూడు వికెట్లు తీయడం సహా సెంచరీ(105) బాదింది. ఫలితంగా అటు బ్యాటింగ్, ఇటు ఆల్రౌండర్ విభాగాల్లో తొలి స్థానానికి ఎగబాకింది. ఇక భారత బ్యాట్స్ఉమెన్ విషయానికి వస్తే.. బ్యాటింగ్ విభాగంలో స్మృతి మంధాన( 701 పాయింట్లు) తొమ్మిదో ర్యాంకులో, ఆల్రౌండర్ విభాగంలో దీప్తిశర్మ(331 పాయింట్లు) ఐదో స్థానంలోనే కొనసాగుతున్నారు.
బౌలింగ్ విభాగం టాప్-10లో ఎలాంటి మార్పు లేదు. జూలన్ గోస్వామి(694 పాయింట్లు, 5వ స్థానం), పూనమ్ యూదవ్(617 పాయింట్లు, 9 స్థానం), ఆస్ట్రేలియా క్రికెటర్లు జెస్ జొనాస్సెన్ (808 పాయింట్లు, 1), మేఘన్ షట్(762 పాయింట్లు, 2) తమ స్థానాల్లోనే నిలిచారు.
టీ20 ర్యాంకింగ్స్
బ్యాటింగ్ విభాగంలో టాప్ -10లో భారత మహిళా క్రికెటర్ల ర్యాంకుల్లో ఏ మార్పు లేదు. అగ్రస్థానంలో షెఫాలీ వర్మ(776 పాయింట్లు), నాలుగో స్థానంలో స్మృతి మంధాన(693 పాయింట్లు) కొనసాగుతున్నారు. ఆల్రౌండర్ విభాగంలోనూ.. దీప్తి శర్మ 304 పాయింట్లతో ఐదో ర్యాంకులో ఉంది. అయితే సోఫీ డివైన్ (న్యూజిలాండ్, 359 పాయింట్లు)ను వెనక్కునెట్టి 365పాయింట్లతో ఈ సారి అగ్రస్థానాన్ని దక్కించుకుంది ఇంగ్లాండ్ క్రికెటర్ నటైల్ సీవర్.
బౌలింగ్ విభాగంలో దీప్తి శర్మ 704 పాయింట్లతో ఆరో ర్యాంకులో నిలవగా.. పూనమ్ యాదవ్(682), రాధా యాదవ్(673) ఏడు, ఎనిమిది స్థానాల్లో నిలిచారు.
ఇదీ చూడండి: ICC Rankings: అగ్రస్థానంలో మిథాలీ, షెఫాలీ
