నాటింగ్హామ్ వేదికగా జరుగుతున్న తొలి టెస్టులో భారత్ మంచి స్థితిలో నిలిచింది. తొలి ఇన్నింగ్స్లో భారత్ 278 పరుగులకు ఆలౌటైంది. దీంతో కోహ్లీ సేనకు 95 పరుగుల ఆధిక్యం లభించింది. టీమ్ఇండియాలో కేఎల్ రాహుల్(84), రవీంద్ర జడేజా(56) అర్ధ సెంచరీలతో రాణించారు. ఇంగ్లాండ్ బౌలర్లలో అండర్సన్ 4, రాబిన్సన్ 5 వికెట్లు దక్కించుకున్నారు.
అనంతరం.. రెండో ఇన్నింగ్స్ ప్రారంభించిన ఇంగ్లాండ్ 11.1 ఓవర్లలో 25/0 స్కోర్‌ చేసింది. ఓపెనర్లు రోరీ బర్న్స్‌(11), డామ్‌ సిబ్లీ(9) పరుగులతో క్రీజులో ఉన్నారు.
వర్షం అంతరాయం..
వర్షం కారణంగా మూడో రోజు ఆట కూడా అర్ధంతరంగా ముగిసింది. తొలుత భారత్ బ్యాటింగ్ ప్రారంభించిన వెంటనే వర్షం పడగా చాలా సేపు మ్యాచ్ ఆగింది. అనంతరం.. ఇంగ్లాండ్ రెండో ఇన్నింగ్స్ సమయంలో వర్షం తీవ్రం కాగా మ్యాచ్ను నిలిపివేశారు.
జడేజా, బుమ్రా దూకుడు..
191/5తో లంచ్ విరామానికి వెళ్లిన కోహ్లీ సేన మరో 87 పరుగులు చేసి ఆలౌటైంది. సెంచరీ దిశగా దూసుకెళ్తున్న రాహుల్ను ఓ చక్కటి బంతితో పెవిలియన్ పంపాడు అండర్సన్. అప్పటికే రెండుసార్లు ఔటయ్యే ప్రమాదం నుంచి తప్పించుకున్న రాహుల్.. అవకాశాన్ని సద్వినియోగం చేసుకోలేకపోయాడు. అనంతరం జడేజా ధాటిగా ఆడి హాఫ్ సెంచరీ పూర్తి చేసుకున్నాడు. ఓ భారీ షాట్కు ప్రయత్నించి రాబిన్సన్ బౌలింగ్లో వెనుదిరిగాడు. చివర్లో బుమ్రా వరుస బౌండరీలతో ఆధిక్యాన్ని మరికొంచెం పెంచాడు.
అండర్సన్ రికార్డు..
ఇంగ్లాండ్ సీనియర్ బౌలర్ జేమ్స్ అండర్సన్ సరికొత్త రికార్డును తన ఖాతాలో వేసుకున్నాడు. సుదీర్ఘ ఫార్మాట్లో అత్యధిక వికెట్లు తీసిన మూడో బౌలర్గా నిలిచాడు. ఈ క్రమంలో భారత మాజీ బౌలర్ అనిల్ కుంబ్లేను (619 వికెట్లు) అధిగమించాడు. కేఎల్ రాహుల్ వికెట్ తీసి జిమ్స్ ఈ ఘనత సాధించాడు. ఈ ఫీట్ చేరుకోవడానికి అతడికి 163 టెస్టులు అవసరమయ్యాయి. ఈ జాబితాలో శ్రీలంక స్పిన్నర్ ముత్తయ్య మురళీధరన్ (800 వికెట్లు) అగ్రస్థానంలో నిలిచాడు. ఆసీస్ దిగ్గజ బౌలర్ షేన్ వార్న్ (708 వికెట్లు) తర్వాత స్థానంలో ఉన్నాడు.
జడేజా సరికొత్త ఫీట్..
ఈ మ్యాచ్లో హాఫ్ సెంచరీతో సత్తాచాటిన జడేజా.. సరికొత్త రికార్డును తన ఖాతాలో వేసుకున్నాడు. అతి తక్కువ టెస్టుల్లో 200 వికెట్లతో పాటు 2000 పరుగులు చేసిన భారత ఆటగాడిగా ఫీట్ సాధించాడు. ఈ జాబితాలో ఇయాన్ బోథమ్ తొలి స్థానంలో ఉన్నాడు. ఇయాన్ కేవలం 42 టెస్టుల్లోనే ఈ ఘనత వహించాడు. ఆ తర్వాతి స్థానాల్లో కపిల్ దేవ్(50), ఇమ్రాన్ ఖాన్(50), అశ్విన్(51) ఉన్నారు.
