అంతర్జాతీయ క్రికెట్​కు అంపైర్​ ఆక్సెన్​ ఫోర్డ్​ వీడ్కోలు

అంపైర్​ ఆక్సెన్ ఫోర్డ్ రిటైర్మెంట్​ కానున్నారు. ఈ విషయాన్ని ఐసీసీ ప్రకటించింది. దాదాపు 15 ఏళ్ల పాటు అంతర్జాతీయ క్రికెట్​లో ఆయన అంపైర్​గా సేవలందించారు.

15 ఏళ్లకుపైగా అంతర్జాతీయ క్రికెట్​లో కొనసాగిన మాజీ క్రికెటర్​, అంపైర్ బ్రూస్ ఆక్సెన్ ఫోర్డ్ రిటైర్ కానున్నారు. ఈ మేరకు ఐసీసీ గురువారం స్పష్టం చేసింది.

2006లో గబ్బా వేదికగా ఆస్ట్రేలియా-దక్షిణాఫ్రికా మధ్య జరిగిన టీ-20తో తొలిసారి అంపైరింగ్ బాధ్యతలు నిర్వర్తించాడు బ్రూస్​. 2012 నుంచి ఐసీసీ అంపైర్​ ఎలైట్ ప్యానెల్​లో సభ్యుడిగా ఉన్నాడు. దాదాపు 62 టెస్టు మ్యాచ్​లకు అంపైర్​గా వ్యవహరించాడు. చివరగా బ్రిస్బేన్​లో ఆస్ట్రేలియా-భారత్​ మధ్య జరిగిన చివరి టెస్టుకు ప్రాతినిధ్యం వహించాడు.

చివరి 3 పురుషుల వన్డే క్రికెట్ ప్రపంచకప్, టీ-20 ప్రపంచకప్ లలో భాగంగా ఉన్నాడు. అంపైర్ కాకముందు.. బ్రూస్ క్వీన్స్ లాండ్ జట్టు తరఫున 8 ఫస్ట్ క్లాస్ మ్యాచ్ లు ఆడాడు.

''నేను నా అంతర్జాతీయ కెరీర్ ను చూసుకుంటే చాలా గర్వంగా ఫీలవుతా. నేను దాదాపు 200 అంతర్జాతీయ మ్యాచ్ లకు ప్రాతినిధ్యం వహించానంటే నమ్మలేకపోతున్నా. ఇన్నేళ్లుగా నాకు సహకరించిన అంతర్జాతీయ క్రికెట్ మండలి(ఐసీసీ), క్రికెట్ ఆస్ట్రేలియా, ఎలైట్ ప్యానెల్ లోని సహచరులు అందరికీ కృతజ్ఞతలు.''

-బ్రూస్ ఆక్సెన్ ఫోర్డ్, అంపైర్.