లాక్డౌన్ సడలింపుల్లో భాగంగా దక్షిణాఫ్రికాలో తిరిగి ప్రారంభం కావాల్సిన '3టీ క్రికెట్' పోటీ జులై 18కి వాయిదా పడింది. స్వదేశానికి చెందిన 24 మంది క్రికెటర్లను ఎంపిక చేసుకుని ఈ మ్యాచ్ను నిర్వహించనున్నారు. జూన్ 27న ఈ టోర్నీ జరగాల్సి ఉండగా.. ప్రస్తుతం ఇంకొంత సమయం అవసరమని సఫారీ క్రికెట్ బోర్టు(సీఎస్ఏ) భావిస్తూ ఈ నిర్ణయం తీసుకుంది.
"టీవీ స్క్రీన్పై మళ్లీ క్రికెట్ ప్రత్యక్ష ప్రసారం చూడటానికి ఎంతో ఆసక్తిగా ఉన్నా. కరోనా వైరస్తో ప్రభావితులైన వారికి నిధులు సేకరించడమే ఈ టోర్నీ ప్రధాన లక్ష్యం. అందుకు జులై 18న నెల్సన్ మండేలా జయంతి కంటే మంచి రోజు ఉంటుందని నేను అనుకోవడం లేదు. మ్యాచ్కు ఇంకా మూడు వారాలు ఉంది. కాబట్టి ఆటగాళ్లు మెరుగయ్యేందుకు ఈ సమయం ఉపయోగపడుతుంది."
డా.జాక్వెన్ ఫాల్, సీఎస్ఏ చీఫ్ ఎగ్జిక్యూటీవ్
ఇందులో జరిగే ఒకే మ్యాచ్లో మూడు జట్లు పోటీ పడనున్నాయి. ఒక్కో జట్టులో 8 మంది ఆటగాళ్లు మాత్రమే భాగం కానున్నారు. లాక్డౌన్ తర్వాత దక్షిణాఫ్రికాలో ప్రత్యక్షంగా ప్రసారమయ్యే తొలి క్రీడా కార్యక్రమం ఇదే కావడం వల్ల.. క్రికెట్ అభిమానులు ఎంతో ఆసక్తిగా ఎదురుచూస్తున్నారు. సెంచూరియన్లోని సూపర్ స్పోర్ట్ స్టేడియం ఈ మ్యాచ్కు వేదిక కానుంది.
3టీ పోటీలో సాలిడారిటీ కప్ కోసం ఈగల్స్, కింగ్ ఫిషర్స్, కైట్స్ జట్లు పోటీ పడనున్నాయి. ఈగల్స్ టీమ్కు కెప్టెన్గా ఏబీ డివిలియర్స్, కింగ్ ఫిషర్స్ జట్టు కెప్టెన్గా రబాడా, కైట్స్ టీమ్కు సారథిగా ప్రస్తుత దక్షిణాఫ్రికా టీమ్ కెప్టెన్ డికాక్ ప్రాతినిధ్యం వహించనున్నారు.
