ఇంగ్లాండ్తో జరిగిన మూడో టెస్టులో టీమ్ఇండియా ఘనవిజయం సాధించింది. భారత్కు కలిసొచ్చే స్పిన్ పిచ్ను నమ్ముకుని గెలుపు కైవసం చేసుకుని ప్రపంచ ఛాంపియన్ షిప్ ఫైనల్కు మార్గం మరింత తేలిక చేసుకుంది. మొదటి టెస్టులో ఓడిన తర్వాత పంథా మార్చుకున్న భారత జట్టు ఆటగాళ్ల ఎంపిక, పిచ్ సెలక్షన్ వంటి అంశాల్లో సరైన నిర్ణయాలు తీసుకుని విజయాల బాట పట్టింది. సిరీస్లో 2-1 తేడాతో ఆధిక్యంలోకి వెళ్లింది. నరేంద్ర మోదీ స్టేడియం వేదికగా జరిగిన మూడో మ్యాచ్లోనూ టీమ్ఇండియా విజయంలో కొన్ని అంశాలు సానుకూలంగా కనిపిస్తున్నాయి. అవేంటో చూద్దాం.
1. జట్టు ఎంపిక, బౌలింగ్ విభాగం
విరాట్ కోహ్లీ సారథ్యంలో జట్టు ఎంపిక సరిగా లేదంటూ చాలాసార్లు విమర్శలు వచ్చాయి. అలాగే బౌలింగ్ ప్రణాళికలూ బాగాలేవంటూ మాజీలు మాట్లాడారు. కానీ ఈ మ్యాచ్లో ఈ రెండు అంశాలపై పట్టు ప్రదర్శించారు కోహ్లీ, మేనేజ్మెంట్.
ఇందులో మొదటిది కుల్దీప్ యాదవ్ స్థానంలో వాషింగ్టన్ సుందర్ను తీసుకోవడం. ఈ నిర్ణయం జట్టుకు కలిసొచ్చింది. ఈ మ్యాచ్లో ఇతడు కేవలం ఒకే వికెట్ తీసుకున్నా.. బ్యాటింగ్ లైనప్ కాస్త బలంగా కనిపించింది. ఈ మ్యాచ్లో ఇతడికి బౌలింగ్ వేసే అవకాశం రాకపోయినా.. ఒకే ఓవర్ వేసిన సుందర్ ఒక వికెట్ దక్కించుకున్నాడు.
బంతితోనూ టీమ్ఇండియా ప్రణాళిక చాలా బాగుంది. పిచ్ వైవిధ్యాన్ని గుర్తించిన స్పిన్నర్లు బంతిని నేరుగా వికెట్లపైకి విసురుతూ ఇంగ్లాండ్ బ్యాట్స్మెన్ను ఇబ్బందిపెట్టారు. అలాగే ఫీల్డింగ్ పొజిషన్ కూడా చక్కగా కుదిరింది. బంతితో చక్కటి ప్రణాళికలతో బరిలో దిగిన టీమ్ఇండియా.. తర్వాత మ్యాచ్లోనూ ఇలాగే దూకుడుగా వ్యవహరించాలని విశ్లేషకులు అభిప్రాయడుతున్నారు.
2. రోహిత్ ఫామ్
రెండో టెస్టు జరిగిన చెన్నై, మూడో టెస్టు జరిగిన మోదీ పిచ్లు బ్యాటింగ్కు ఏమాత్రం అనువుగా లేవంటూ ప్రత్యర్థి జట్టు ఆరోపించింది. కానీ ఇవే పిచ్లపై అటు టీమ్ఇండియా, ఇటు ఇంగ్లాండ్ బ్యాట్స్మెన్ ఇబ్బందిపడుతున్న వేళ రోహిత్ శర్మ అద్భుత బ్యాటింగ్తో అలరించాడు. రెండో టెస్టు తొలి ఇన్నింగ్స్లో భారీ శతకం(161)తో ఆకట్టుకున్న హిట్మ్యాన్.. రెండో ఇన్నింగ్స్లో కీలక పరుగులు సాధించాడు. అలాగే రెండో టెస్టు తొలి ఇన్నింగ్స్లో అద్భుత అర్ధశతకంతో జట్టును ఆదుకున్నాడు. స్వీప్ షాట్లు, ఫుట్వర్క్ విషయంలో మెరుగ్గా కనిపించిన రోహిత్.. అత్యుత్తమంగా బ్యాటింగ్ చేశాడు. చెత్త బంతులను బౌండరీలు తరలిస్తూ ఆత్మవిశ్వాసాన్ని పెంచుకున్నాడు.
బెంచ్ స్ట్రెంత్
కరోనా కారణంగా అందరూ ఫిట్నెస్ సమస్యలతో బాధపడుతోన్న వేళ టీమ్ఇండియా మాత్రం తన బెంచ్ స్ట్రెంత్ను పెంచుకుంది. గాయాల కారణంగా ఒక్కో ప్రధాన ఆటగాడు వైదొలుగుతుంటే..ఒక్కో ఆణిముత్యం బయటకొచ్చింది. ఆస్ట్రేలియాతో జరిగిన టెస్టు సిరీస్తో పాటు ఇంగ్లాండ్తో జరుగుతోన్న ఈ సిరీస్లో కొత్త ఆటగాళ్ల ప్రదర్శన టీమ్ఇండియాకు పెద్ద సానుకూలాంశం. అలా ఈ మ్యాచ్లో చెప్పుకోదగిన ఆటగాడు అక్షర్ పటేల్. సొంత మైదానంలో చెలరేగిపోయిన ఇతడు 11 వికెట్లతో సత్తా చాటి మ్యాన్ ఆఫ్ ద మ్యాచ్ కైవసం చేసుకున్నాడు. ఇంతకుముందు ఒక్క టెస్టు మ్యాచ్ కూడా ఆడని ఆటగాడు.. ఆడిన రెండు మ్యాచ్ల్లో 18 వికెట్లు సాధించడం చూస్తే భారత జట్టు అమ్ములపొదిలో ఎన్ని అస్త్రాలున్నాయో అర్థం చేసుకోవచ్చు.
