MCA Guinness Record : ముంబయి క్రికెట్ అసోసియేషన్‌ (MCA) వాంఖడే స్టేడియం 50 ఏళ్ల సంబరాలు ఘనంగా నిర్వహిస్తోంది. వేడుకల్లో భాగంగా గురువారం 14,505 ఎరుపు, తెలుపు బంతులు ఉపయోగించి మైదానంలో 'ఫిప్టీ ఇయర్స్‌ ఆఫ్‌ వాంఖడే స్టేడియం' అనే వాక్యం రాసింది. క్రికెట్ బంతులు ఉపయోగించి రాసిన 'అతి పెద్ద వాఖ్యం (Largest Cricket Ball Sentence)'గా దీనికి గిన్నిస్ రికార్డు వరించింది. దీంతో ప్రతిష్ఠాత్మకమైన వాంఖడే చరిత్రలో మరో అరుదైన రికార్డు చేరింది.
అయితే వాంఖడే స్టేడియంలో మొట్టమొదటి క్రికెట్ మ్యాచ్‌ జరిగిన రోజునే గిన్నిస్ అవార్డు అందుకోవడం విశేషం. వాంఖడేలో 1975 జనవరి 23న తొలి అంతర్జాతీయ టెస్ట్‌ మ్యాచ్‌ జరిగింది. ఇందులో భారత్- వెస్టిండీస్‌ తలపడ్డాయి. ఈ మ్యాచ్‌లో దివంగత ఏక్‌నాథ్ సోల్కర్‌ సెంచరీ బాదాడు. ఎంసీఏ సాధించిన రికార్డును ఈ ఏక్‌నాథ్ సోల్కర్‌, భారత్‌కి ప్రాతినిథ్యం వహించిన ముంబయి ప్లేయర్లకు అంకితం ఇచ్చింది.
ఈ బంతులు ఎవరికంటే?
ఎంసీఏ ప్రెసిడెంట్ అజింక్య నాయక్, ఆఫీస్ బేరర్లు, అపెక్స్ కౌన్సిల్ సభ్యుల సమక్షంలో ఈ రికార్డు సాధించారు. ఎంసీఏ ఈ రికార్డును సాధించడానికి ఉపయోగించిన బంతులను నగరంలోని పాఠశాలలు, క్లబ్‌లు, NGOలకు చెందిన ఔత్సాహిక క్రికెటర్లకు అందజేయనుంది.
ఈ సందర్భంగా ఎంసీఏ ప్రెసిడెంట్ అజింక్యా నాయక్ మాట్లాడారు. 'ముంబయి క్రికెట్ క్రీడకు గణనీయంగా దోహదపడింది. క్రికెట్ చరిత్రలో దీనికి ప్రత్యేక స్థానం ఉంది. ఈ నగరం ప్రపంచం చూసిన గొప్ప క్రికెటర్లలో కొందరిని తయారు చేసింది. వాంఖడే స్టేడియం ముంబయికి గర్వకారణం. లెక్కలేనన్ని చారిత్రక ఘట్టాలకు సాక్ష్యంగా ఉంది. ఈ గిన్నిస్ ప్రపంచ రికార్డ్స్ టైటిల్ ముంబయి క్రికెట్ ప్యాషన్‌కి ప్రతిబింబం' అని తెలిపారు.
ఏ పదానికి ఎన్ని బంతులంటే?
- మొత్తం 14,505 బంతులు వాడారు
- FIFTY అనే పదం రాయడానికి 1902 బంతులు ఉపయోగించారు
- YEARS పదానికి 2831 బంతులు
- OF పదానికి 1066 బంతులు
- WANKHEDE పదానికి 4990 బంతులు
- STADIUM పదానికి 3672 బంతులు
- FULL STOP (.) సింబల్కు 44 బంతులు
'నువ్వు సూపర్ రోహిత్, ఇందుకే నువ్వంటే మాకిష్టం'- కెప్టెన్పై నెటిజన్ల ప్రశంసలు
